სამთავრობო მანქანით თურქეთიდან აჭარის ტერიტორიაზე ნარკოტიკების შემოტანის შესახებ ინფორმაცია ბიძინა ივანიშვილს მურმან დუმბაძემ უამბო. ვიცე-სპიკერი დუმბაძე "პოსტსკრიპტუმთან" საუბრის დროს აცხადებს, რომ კონკრეტული დღე ახსოვს, როცა ივანიშვილს შეხვდა და სკანდალური ინფორმაცია სხვა მნიშვნელოვან ამბებთან ერთად გააცნო.
"17 ნოემბერი იყო შაბათი დღე. მე ბიძინა ივანიშვილს ვხვდები, უნდა გადავცე ჩანაწერი, სადაც ერთ-ერთ პუნქტში მიწერია, რომ აჭარაში შემოვიდა ნარკოტიკები სამთავრობო მანქანით, რომელიც ჭეიშვილს ეკუთვნოდა. ამის შემდეგ ხდება ის რაც ხდება,"- აცხადებს მურმან დუმბაძე.
საქართველოს პარლამენტის წევრი ამბობს, რომ ბიძინა ივანიშვილი და ირაკლი ღარიბაშვილი ქვეყანას "ქუჩური მენტალიტეტით" მართავენ.
"ივანიშვილი-ღარიბაშვილის ხელისუფლება ქუჩური პრინციპით მუშაობს. ეს პრინციპი კი ასეთია-ჩემს კაცს შენ ვერ შეეხები,"- აცხადებს მურმან დუმბაძე.
