კავკასიის გარემოსდაცვითი არასამთავრობო ორგანიზაციების ქსელის (CENN) პროექტის „ღია გარემოდაცვითი სამოქალაქო ინიციატივას" კოორდინატორის რეზო გეთიაშვილის განცხადებით, ერთი შეხედვით, შსს-მ ველისციხეში არსებულ საგანგებო სიტუაციაზე ადეკვატური რეაგირება მოახდინა და მზადყოფნა აჩვენა, თუმცა საქართველოში ბუნებრივი კატასტროფების მართვა ძალიან სუსტია.
„ბუნებრივი კატასტროფების მართვა ისევ რეაგირებით იწყება, მანამდე კი ყველა ეტაპი ჩავარდა - შეფასება, პრევენცია და ა.შ. საინტერესოა, საიდან ჰქონდა ინფორმაცია ხელისუფლებას იმის შესახებ, რომ ველისციხეში დასახლებულ პუნქტს ჯერ 8, შემდეგ კი 5 მეტრის სიმაღლის ტალღა გადაუვლიდა და რამდენად სანდო იყო ეს ინფორმაცია? თუკი ასეთი ინფორმაცია არსებობდა, რატომ დაიწყო რეაგირება დაგვიანებით და რატომ არ დაიგეგმა სამუშაოები მშვიდ და წყნარ ამინდში? თუ შეფასება არ არსებობდა, მაშინ რამდენად უსაფრთხოა სხვა ანალოგიური ობიექტები და რამდენად დაცულია მათ სიახლოვეს მცხოვრები მოსახლეობა? და თუ ასეთი შეფასებები არსებობს, მაშინ სად მიდის ეს შეფასებები და რატომ არ მოსდევს მას შემდგომი გაგრძელება?", - კითხულობს გარემოსდაცვითი ორგანიზაციის წარმომადგენელი.
მისივე თქმით, მდინარე დურუჯზე შეფასებებიც არსებობს, რისკიც გაცილებით მაღალია და მოსალოდნელი კატასტროფის მასშტაბიც, ვიდრე ველისციხის შემთხვევაში, მაგრამ რეაგირება არ ხდება.
„თუ ხელისუფლებას სურს, რომ ადეკვატური იყოს, საფრთხეების აცილების პროცესი დაუყოვნებლივ, მისი შეფასების ეტაპიდან უნდა დაიწყოს", - აღნიშნავს რეზო გეთიაშვილი.
