კავკასიის გარემოსდაცვითი არასამთავრობო ორგანიზაციების ქსელი (ჩENN) საქართველოს მთავრობის გასვლით სხდომას, რომელიც 28 აპრილს თელავში უნდა გაიმართოს, დროულად მიიჩნევს და მთავრობას იმ საკითხების ჩამონათვალს სთავაზობს, რომლის განხილვაც გადაუდებელი და სასიცოცხლო მნიშვნელობისაა.
ასოციაცია CENN საქართველოს მთავრობას მოუწოდებს, სხდომის დღის წესრიგში შეიტანოს დურუჯის პრობლემა და საზოგადოებას მისი გადაჭრის გეგმა წარუდგინოს. სპეციალისტების შეფასებით, დურუჯზე დამცავი ჯებირი მთლიანად ამორტიზებულია და მილიონობით კუბური მეტრის მოცულობის ნატანს თითქმის აღარაფერი უშლის ხელს, რომ ქალაქისკენ დაიძრას.
„მთავრობამ ასევე უნდა წარმოადგინოს, რა გეგმები აქვს ქვეყანაში არსებულ წყალსატევებთან დაკავშირებით. როგორც ველისციხის პრობლემამ დაგვანახა, ხელისუფლება მსგავსი ობიექტების მდგომარეობის შესახებ ინფორმაციას არ ფლობს. მათმა ავარიულობამ და გაუმართაობამ კი შესაძლოა მოსახლეობას სერიოზული საფრთხე შეუქმნას", - აცხადებენ ასოციაცია CENN-ში.
გარემოსდაცვითი ორგანიზაცია მიიჩნევს, რომ მნიშვნელოვანია იმ 350-ზე მეტი ობიექტის საკითხიც, რომელიც გარემოს ეროვნული სააგენტოს შეფასებით, სასწრაფო რეაგირებას საჭიროებს.
„შესაბამისად, განხილვის საგანი ისიც უნდა გახდეს, რამდენად მიზანშეწონილი იყო თანხების დაზოგვა პრევენციულ ღონისძიებებზე. როგორც ცნობილია, ხელისუფლებამ საბიუჯეტო პროცესის სახელმძღვანელო BDD დოკუმენტით დადგენილი პრიორიტეტები შეცვალა და მიმდინარე წელს ბუნებრივი კატასტროფების პრევენციის ხარჯები 9 მილიონიდან - 1, 800 ათას ლარამდე შეამცირა", - განაცხადეს კავკასიის გარემოსდაცვითი არასამთავრობო ორგანიზაციების ქსელში.
