ხვალ, 29 ივნისს, 16:30 საათზე, საქართველოს პარლამენტის კინოდარბაზში, თბილისში, იურიდიულ საკითხთა კომიტეტის თავმჯდომარე და კომიტეტის წევრები საქართველოში მოქმედი უმაღლესი სასწავლებლების, კერძოდ: თბილისის სახელმწიფო
უნივერსიტეტის, ილიას სახელმწიფო უნივერსიტეტის, სოხუმის სახელმწიფო უნივერსიტეტის, გრიგოლ რობაქიძის სახელობის უნივერსიტეტისა და შავი ზღვის საერთაშორისო უნივერსიტეტის სტუდენტებს შეხვდებიან.
აღნიშნულ თემატურ შეხვედრაზე სტუდენტებს შესაძლებლობა ექნებათ, მოუსმინონ და
გაესაუბრონ კომიტეტის თავმჯდომარესა და წევრებს, რომლებიც კანონშემოქმედებით
საქმიანობაზე, კომიტეტის პრიორიტეტებსა და სამომავლო გეგმებზე ისაუბრებენ.
შეხვედრაზე წარმოდგენილი იქნება, აგრეთვე, კომიტეტის მიერ განხორციელებული
ყველაზე მნიშვნელოვანი პროექტები.
შეხვედრა, რომელიც დაგეგმილია, რომ 90 წუთს გაგრძელდება, ორ ნაწილად დაიყოფა:პირველი ნაწილი დაეთმობა კომიტეტის თავმჯდომარის გამოსვლას, ხოლო მეორე ნაწილი კითხვა-პასუხის რეჟიმში წარიმართება, რომელშიც აღნიშნული კომიტეტის წევრები და სტუდენტები ჩაერთვებიან.
შეხვედრის დასრულების შემდეგ სტუდენტებისთვის გათვალისწინებულია საექსკურსიო ტური, გიდის თანხლებით,რომლის დროსაც ახალგაზრდებს შესაძლებლობა ექნებათ, გაეცნონ პარლამენტის სტრუქტურას, კანონშემოქმედებით საქმიანობას და ზოგადად, საკანონდებლო პროცესს.
საქართველოს პარლამენტის საქმიანობაზე, მის როლსა და მისიაზე საზოგადოებრივი განათლების და ცნობიერების ამაღლების მიზნით, აგრეთვე, პარლამენტის კანონშემოქმედებით საქმიანობასა და პროგრამებში მოქალაქეების, სამოქალაქო საზოგადოებისა თუ სხვა ინტერეს-ჯგუფების აქტიური მონაწილეობის და ჩართულობის
ხელშეწყობის უზრუნველსაყოფად პარლამენტის კომიტეტების სტუდეტებთან შეხვედრებს რეგულარული ხასიათი აქვს. თითოეულ თემატურ შეხვედრაზე, ამა თუ იმ
კომიტეტის საქმიანობიდან, შინაარსიდან და თემიდან გამომდინარე, მოწვეულია სახელმწიფო და კერძო უნივერსიტეტების როგორც საბაკალავრო, ისე სამაგისტრო პროგრამებში ჩართული 100-მდე სტუდენტი.
