პოლკოვნიკ სერგო თეთრაძის მეუღლე ნანა თეთრაძე მისი მეუღლის გარდაცვალებაში ყოფილ მაღალჩინოსნებს ბაჩო ახალაიას და მეგის ქარდავას ადანაშაულებს. როგორც ნანა თეთრაძემ საქალაქო სასამართლოში ე.წ. ჯაშუშების საქმეზე მიმდინარე პროცესზე დაკითხვისას განაცხადა, 2011 წლის 17 სექტემბერს, დილის 6 საათზე მათთან სახლში 5-6 პირი მივიდა რომლებმაც სახლი გაჩხრიკეს, ნივთები ამოალაგეს და მათ შორის ოჯახის წევრებმა ნახეს წითელი მეხსიერების ბარათი, რომელიც ოჯახს არ ეკუთნოდა.
ნანა თეთრაძის განცხადებით, მეუღლის წაყვანის შემდეგ გაიგო, რომ იგი წინასწარი დაკავების იზოლატორში იყო მოთავსებული.
,,შემდეგ მეზობლებმა მირჩიეს ადოკვატის აყვანა. ადვოკატმა სერგო მოინახულა წინასწარი დაკავების იზოლატორში და როდესაც გამოვიდა, მითხრა, რომ საშინელი დაზიანებები ჰქონდა მიყენებული, მათ შორის გატეხილი ჰქონდა ცხვირი. შემდეგ ჩაინიშნა აღკვეთის ღონისძიების პროცესი, სადაც ჩემი მეუღლე ძლივს ვიცანი, ისეთ მდგომარეობაში იყო. 23 სექტემბერს კი შემატყობინეს, რომ იგი გარდაიცვალა გულით, თუმცა ჩემს მეუღლეს გული არასდროს აწუხებდა", - განაცხადა ნანა თეთრაძემ.
საქალაქო სასამართლოში მიმდინარე პროცესზე ნანა თეთრაძემ წარუდგინა ის ფოტომასალა, რომელიც სერგო თეთრაძის დაკავებამდე და გარდაცვალების შემდეგ ჰქონდა გადაღებული.
მისი თქმით, გარდაცვლილი სახლში მიასვენეს სულ სხვა ტანსაცმლით, ხოლო ფეხსაცმელზე, რომელიც მას ეცვა, სისხლის ლაქები შეინიშნებოდა.
პროცესზე ბრალდებულის ადვოკატები დაინტერესდნენ დაჰპირდა თუ არა ნანა თეთრაძეს თავდაცვის ყოფილი მინისტრი ირაკლი ალასანია რომ ბაჩო ახალაიას პასუხისგებაში მისცემდა, რაზეც ნანა თეთრაძემ განაცხადა, რომ მსგავს დაპირებას ალასანიას მხრიდან ადგილი არ მიუღია.
სერგო თეთრაძის მეუღლის დაკითხვის შემდეგ სასამართლო სხდომა გადაიდო და ის პროცესი 24 ივნისს 12:00 საათზე გაგრძელდება.
