“ერთიანი ნაციონალური მოძრაობის“ დეპუტატი გიორგი გაბაშვილი, გიგი უგულავას საქმეზე მოსამართლის მხრიდან მამუკა ახვლედიანის მოწმის სახით დაკითხვაზე უარის თქმას ეხმაურება და აცხადებს, რომ ეს პირდაპირ მიუთითებს დაცვისა და ბრალდების მხარის არათანაბარ პირობებში ჩაყენებასა და სასამართლოს მხრიდან პირდაპირი დაკვეთის შესრულებაზე.
გაბაშვილი მიიჩნევს, რომ მამუკა ახვლედიანის მოწმის სტატუსით დაკითვაზე უარის თქმა, საკონსტიტუციო სასამართლოში შეტანილ სარჩელს უკავშირდება, რომელიც გიგი უგულავასთვის წინასწარი პატიმრობის გადაჭარბებულ ვადას გულისხმობს.
„გიგი უგულავა უკანონო წინასწარ პატიმრობაში იმყოფება, რადგან ამისთვის განკუთვნილი 9 თვე დიდი ხანია გავიდა. ესაა კონსტიტუციის პირდაპირი დარღვევა, სადაც წინასწარი პატიმრობის ვადები გაწერილია. სწორედ ამიტომ, ჩვენ საკონსტიტუციო სასამართლოში შეტანილი გვაქვს სარჩელი. ცხადია, რომ სასამართლოს ქმედებებიც ამას უკავშირდება. ისინი ცდილობენ სანამ საკონსტიტუციო სასამართლო გადაწყვეტილებას გამოიტანს, უგულავას მიუსაჯონ.
სასამართლო პირდაპირ ზღუდავს დაცვის მხარის უფლებებს და ეს ნათლად ჩანს შემდეგი მაგალითებიდან - ბრალდების მხარეს, ანუ პროკურატურას მტკიცებულებებისა და მოწმეების წარსადგენად წელიწადი და 8 თვე ჰქონდათ, დაცვის მხარეს კი ამისთვის მხოლოდ თვე-ნახევარი მიეცა. ასევე, ბრალდების მხრიდან 90-მდე მოწმე გამოკითხეს, დაცვის მხარის მხრიდან კი 15-20 .
გვინდა ავღნიშნოთ, რომ სასამართლოს ამგვარი მოქმედება აღმაშფოთებელია. ზოგადად, სასამართლოში სიტუაცია სავალალოა, დაბრუნდა კორუფცია, რაზეც მოსამართლეებიც საუბრობენ. მთავარი, რაც ახალ თავმჯდომარეს ევალება, როგორც ჩანს, ესაა მთავრობის ინტერესებისა უზრუნველყოფა, რომ პოლიტიკურ ოპონენტებს პრობლემების გარეშე შეუფარდონ ბრალი“, _ განაცხადა გიორგი გაბაშვილმა.
რაც შეეხება მამუკა ახვლედიანის პოზიციას, როგორც ის აცხადებს, საქმეში, რომელსაც სასამართლო განიხილავს და რიყის, ტელეიმედისა და თბილსერვის ჯგუფის ეპიზოდებს ეხება, მისი დაკითხვა ობიექტური გადაწყვეტილების მიღებისთვის უმნიშვნელოვანესია.
„ეს საქმეები ეხება 2009 წელს, როცა დედაქალაქის ვიცე-მერი ვიყავი და ამავდროულად ადმინისტრაციას ვხელმძღვანელობდი. მე ვიყავი ის პიროვნება რომელიც მთავრობის სხდომებს წარმართავდა და იღებდა ამა თუ იმ მნიშვნელოვან გადაწყვეტილებას.
ბრალდების მხარე უგულავას ედავება, რომ ხალხის დასაქმება მოხდა არაკანონიერად და აქ ეყრდნობა მოწმე ტარიელ ხიზანეიშვილის, რომელიც იმ პერიოდში დასუფთავების საქალაქო სამსახურის უფროსი იყო. სინამდვილეში, იმ პერიოდში გადაწყვეტილებების მიმღები მე ვიყავი. მოსამართლე ლაშა ჩხიკვაძემ კი, ყოველგვარი განმრტების გარეშე უარი თქვა ჩემს დაკითხვაზე. ეს კითხვის ნიშნის ქვეშ აყენებს საქმეზე ობიექტური განაჩენის გამოტანას. ამიტომ, ჩვენ მოსამართლეს ჩვენი პოზიცია წერილობით მივწერეთ და განვუმარტეთ მდგომარეობა, რაც იმ პერიდოში მერიაში იყო შემქნილი.
ჩემი დაკითხვის გარეშე მოსამართლე მოკლებული იქნება შესაძლებლობას გამოიტანოს ობიექტური გადაწყვეტილება და ეს იქნება დამყარებული უგულავასთვის არარსებული ბრალის დადგენასა და მოსყიდული ხიზანიშვილის ჩვენებაზე“, _ განაცხადა მამუკა ახვლედიანმა.
