დასავლეთის ქვეყნებმა სასწრაფოდ უნდა დაიწყონ თავიანთი არაბირთვული შეიარაღების ეფექტურობის ამაღლება, რათა რუსეთის პრეზიდენტ ვლადიმერ პუტინის აგრესიული პოლიტიკისთვის წინააღმდეგობის გაწევა შეძლონ.
ასეთი დასკვნა ლონდონის საერთაშორისო ურთიერთობათა სამეფო ინსტიტუტის სპცეიალისტებმა გააკეთეს.
მათ მიერ მომზადებულ მოხსენებაში ნათქვამია, რომ საბჭოთა კავშირის დაშლის შემდეგ დამყარებული წესრიგის ნებისმიერი სახით დარღვევამ ევროკავშირისა და ნატო-ს არსებობას შესაძლოა საფრთხე შეუქმნას.
ამასთან, ექსპერტები მიიჩნევენ, რომ ევროპა ამ სტრუქტურის შენარჩუნებას ვერ უმკლავდება.
კერძოდ, ისინი განმარტავენ, რომ ევროპულმა სახელმწიფოებმა ჯეროვნად ვერ შეაფასეს ის საფრთხეები, რაც ბოლო წლების განმავლობაში რუსეთიდან მოდიოდა, ვერც უკრაინის მიმართ რუსეთის აგრესიას გასცეს საკადრისი პასუხი და რთულ ვითარებაში, ვერც კიევს გაუწიეს ეფექტური დახმარება.
მოხსენების ავტორთა შორის მოსკოვში ბრიტანეთის ყოფილი ელჩები: სერ როდერიკ ლაინი და სერ ენდრიუ ვუდიც არიან.
დოკუმენტში ნათქვამია, რომ ვლადიმერ პუტინის ამბიციების მუდმივი ზრდა დასავლეთის ,,რბილმა და არადამაჯერებელმა რეაქციებმა” გამოიწვია, თუნდაც მას შემდეგ, რაც რუსეთმა აფხაზეთი და სამხრეთ ოსეთი დაიპყრო.
,,კრემლს მიაჩნია, რომ ევროპას არ აქვს იმის ძალა, თავისი პრინციპები სათანადოდ დაიცვას. რუსეთი თავის ამბიციებს და პრინციპებს, 10 წელზე მეტი ხნის განმავლობაში გასაგებად გამოხატავდა, თუმცა ევროპამ არჩია, რომ ამის იგნორირება და იმ ფანტაზიებზე დაყრდნობა ჯობდა, თითქოს რუსეთი ლიბერალური დემოკრატიისკენ მიემართებოდა.” - წერენ ლონდონელი ექსპერტები აღნიშნულ დოკუმენტში.
ისინი არ გამორიცხავენ, რომ უკრაინის კონფლიქტის შედეგები ევროპულ სახელმწიფოებს რუსეთთან პირისპირ შეჯახებამდე მიიყვანს.
ამასთან, მათი აზრით, ვერავინ დადგება იმის გარანტად, რომ თუ კონფლიქტის ესკალაცია რეალურად მოხდა, რუსეთი ტაქტიკურ ბირთვულ იარაღს არ გამოიყენებს, რომლითაც ის, ჯერ კიდევ, ,,ცივი ომის” პერიოდიდან იმუქრება.
ბრიტანელი სპეციალისტები დარწმუნებულები არიან, რომ პუტინი ასეთი ნაბიჯისთვის მზად არის, თუმცა დასავლელ ლიდერებს ამის დაჯერება არ შეუძლიათ.
მათი აზრით, ევროპის გადაიარაღების მასშტაბური პროგრამა რუსეთს დაანახებს, რომ აუცილებლობის შემთხვევაში, დასავლეთი განსაზღვრული საომარი მოქმედებებისთვის მზად არის.
,,ამ ნაბიჯის გადადგმა აუცილებელია, ვინაიდან პუტინმა უკვე დაგვანახა, რომ ის დასავლელი ლიდერების სისუსტეების გამოსაყენებლად მუდამ მზად არის.” - აღნიშნავენ ექსპერტები.
იმის გათვალისწინებით, რომ რუსეთი თავისი შეიარაღებული ძალების მოდერნიზებას ეწევა, მოხსენების ავტორების აზრით, აუცილებლია, დასავლეთმა რუსეთს დაანახოს, რომ ის მის მორიგ აგრესიას იარაღით შეეწინააღმდეგება, მათ შორის, ე. წ. ,,ჰიბრიდული” ომის წარმოებითაც.
,,რუსეთის აგრესიის შესაჩერებლად ნატო-მ თავისი ავტორიტეტი და როლი უნდა შეინარჩუნოს. მან განსაკუთრებულად იმის დემონსტრირება უნდა მოახდინოს, რომ შეზღუდული შეიარაღებული კონფლიქტი არ იარსებებს და ,,ჰიბრიდულ” ომზე მისი რეაქცია უმკაცრესი იქნება.” - მიიჩნევენ ინგლისელი ექსპერტები.
მათი აზრით, უკრაინის კონფლიქტი გახდა საკვანძო მომენტი, რომელსაც დასავლეთის მომავალი უსაფრთხოების განსაზღვრა შეუძლია და უკრაინის კრახი აღმოსავლეთ ევროპაში არასტაბილურ გარემოს გააღრმავებს, ამასთან, გაზრდის კრემლის მორიგი ავანტიურის რისკს და რუსეთში მომავალი პოზიტიური ცვილებების შანსს მოსპობს.
