ოდესის ოლქის ახალ პროკურორად საქართველოს ყოფილი გენერალური პროკურორი და აჟამად ძებნაში მყოფი ზურაბ ადეიშვილი, ხოლო მილიციის უფროსად - გენერალ-მაიორი, უკრაინის შინაგან საქმეთა მინისტრის მოადგილე ალექსი რუდენკო დაინიშნება.
ორივე მათგანს თავიანთ თანამდებობებზე უახლოეს ხანებში წარადგენენ. ამის შესახებ, უკრაინის პრეზიდენტის ადმინისტრაციის წყაროზე დაყრდნობით, რუსული სააგენტო Преступности.НЕТ წერს.
,,ოდესის ოლქის ახალდანიშნულმა ხელმძღვანელმა, მიხეილ სააკაშვილმა უკვე გამოყო ის ადამიანები, ვისთან ერთადაც რეგიონში კორუფციასთან ბრძოლას აპირებს. უახლოეს პერიოდში, ოდესის ოლქის პროკურორის პოსტს საქართველოს ექს-გენპროკურორი, იურისტი, საქართველოს პროკურატურაში რეფორმების ფუძემდებლად ცნობილი ზურაბ ადეიშვილი ჩაიბარებს. შეიცვლება შსს-ს ოდესის ოლქის მთავარი განყოფილების უფროსიც და ივან კატერინჩუკის ნაცვლად, ოდესის მთავარი მილიციელი გენერალ-მაიორი ალექსეი რუდენკო გახდება.”- ამბობს გამოცემასთან საუბარში სანდო წყარო.
