უკრაინის პრეზიდენტი პეტრო პოროშენკო გუშინ ოდესის საოლქო ადმინისტრაციის ხელმძღვანელს მიხეილ სააკაშვილს შეხვდა. ამის შესახებ ინფორმაციას პოროშენკოს პრეს-სამსახური ავრცელებს. მანამდე სააკაშვილი რეგიონის მოსახლეობას გაეცნო და მისი თქმით, ოდესელებმა უკრაინის პრეზიდენტის დადგენილება, კორუფციასა და ოლიგარქების თვითნებობასთან ბრძოლის შესახებ, დადებითად შეაფასეს. ოდესის ოლქის ხელმძღვანელთან საუბრისას, თავად პოროშენკომ აღნიშნა, რომ უკრაინელების დიდმა ნაწილმა იმედიათა და ოპტიმიზმით მიიღო სააკაშვილის ამ თანამადებობაზე დანიშვნის ფაქტი. ,,ისინი უკვე უახლოეს პერიოდში ელიან კონკრეტულ პრაქტიკულ შედეგებს. უპირველესად, ეს ეხება კორუფციასთან ბრძოლას და წესრიგის დამყარებას.” - განაცხადა უკრაინის პრეზიდენტმა. მან მოიწონა სააკაშვილის პირველი ინიციატივები, რომელიც რაიონული ადმინისტრაციების ხელმძღვანელთა თანამადებობებზე მოქალაქეთა კონკურსის გზით შერჩევას ითვალისწინებს. პოროშენკო დარწმუნებულია, რომ ამ იდეას ხელისუფლება აუცილებლად დაუჭერს მხარს. ,,მე ძალიან მომწონას საოლქო ადმინისტრაციაში შტატების შემცირების იდეა. დერეგულაციის, დებიუროკრატიზაციის და დეოლიგარქიზაციის პროცესი, ეს ისაა, რაც ოდესას და მთელ უკრაინას წინ ელოდება.” - განაცხადა პოროშენკომ. მისი თქმით, ოდესის საოლქო ადმინისტრაციის ხელმძღვანელად სააკაშვილის დანიშვნას საზღვარგარეთაც დიდ ყურადღებას აქცევენ. ამ პოსტზე მისმა დამტკიცებამ დაადასტურა, რომ უკრაინის ხელისუფლება რეფორმების გასატარებლად, კორუფციის დასამარცხებლად და იმ პრინციპების დასანერგად არის მზად, რომელთა დემონსტრირებაც საქართველოში ასე ეფექტურად მოხდა.
