რუსეთი აღმოსავლეთ უკრაინაში მიმდინარე საომარ მოქმედებებში მონაწილეობას უარყოფს, მიუხედავად იმისა, რომ ცეცხლის ხაზზე რუსი ჯარისკაცების ყოფნის დამადასტურებელი ფაქტები არაერთხელ გამოქვეყნდა.
ოფიცილაური პირები აცხადებენ, რომ უკრაინაში მხოლოდ რუსი მოხალისეები იბრძვიან, ხოლო ის ფოტო და ვიდეომასალები, რომლებითაც უკრაინული მხარე საწინააღმდეგოს დამტკიცებას ცდილობს, გაყალბებული და დამონტაჟებულია.
მიმდინარე თვეს უკრაინის ხელისუფლებამ ტყვედ რუსეთის ორი მოქალაქე, ალექსანდრ ალექსანდროვი და ევგენი ეროფეევი აიყვანა, რომლებმაც აღიარეს, რომ ისინი რუსეთის შეიარაღებული ძალების სამხედროები არიან.
რუსეთის თავდაცვის სამინისტროს მტკიცებით კი, ეს ადამიანები არმიიდან დათხოვნის შემდეგ თავიანთი სურვილით წავიდნენ უკრაინაში.
ატლანტიკური საბჭოს სამუშაო ჯგუფმა გადაწყვიტა, საბრძოლო მოქმედებების ზონაში რუსეთის სამხედრო ნაწილების მონაწილეობა ღია წყაროების და Google Maps-ის მეშვეობით დაამტკიცოს.
სამუშაო ჯგუფში რამდენიმე ექსპერტი, მათ შორის უკრაინაში აშშ-ს ყოფილი ელჩი, ჯონ ჰერბსტიც შედის.
რუსეთის ხელისუფლებას ჯერ არ გაუკეთებია კომენტარი ატლანტიკური საბჭოს მოხსენებაზე, რომელიც ასეა დასათაურებული: ,,თვალთახედვიდან მიმალული: პუტინის ომი უკრაინაში.”
დოკუმენტში ნაჩვენებია, რომ დონეცკისა და ლუგანსკის ოლქებზე მიტანილი ფართომასშტაბიანი შეტევები რუსეთის ტერიტორიიდან არის განხორციელებული, რაზეც თანამგზავრიდან გადაღებული სურათებიც მიუთითებს, დაბომბვების შედეგად დატოვებული კვალიც და ღია წყაროებიდან მიღებული მონაცემებიც.
