აშშ-ს ვიცე-პრეზიდენტმა ჯო ბაიდენმა გუშინ ვაშინგტონში, ბრუკინგსკის ინსტიტუტში გამოსვლისას, უკრაინის მიმართ ,,სასტიკი აგრესიის” გამო რუსეთის პრეზიდენტი ვლადიმერ პუტინი მკაცრად გააკრიტიკა და განაცხადა, რომ პუტინს პასუხისმგებლობა ,,საკუთარ სახლში გატარებული აგრესიული რეპრესიების” გამოც ეკისრება.
ბაიდენის სიტყვით გამოსვლა აშშ-ს პრეზიდენტ ბარაკ ობამას ბავარიაში ვიზიტის წინა პერიოდს დაემთხვა. ობამა გერმანიაში ,,დიდი შვიდიანის” სამიტს დაესწრება, სადაც უკრაინაში მიმდინარე მოვლენებიც იქნება განხილული.
ბაიდენმა აღნიშნა, რომ უკრაინასთან დაკავშირებით რუსეთის ქმედებები მსოფლიო წესრიგზე მნიშვნელოვან ზეგავლენას მოახდენს.
,,ჩვენ არ გვინდა, რომ პუტინი დავამციროთ, ჩვენ არ ვცდილობთ მისი რეჟიმის შეცვლას. ჩვენ არ ვისწრაფვით რუსეთის შიგნით ფუნდამენტური ცვლილებებისთვის. ჩვენ გვინდა, რომ ის რაციონალურად მოიქცეს.” - განაცხადა აშშ-ს ვიცე-პრეზიდენტმა.
მისი თქმით, აღმოსავლეთ უკრაინის კონფლიქტი, რომელმაც 6 000-ზე მეტი ადამიანის სიცოცხლე შეიწირა, დასავლეთის და ნატო-სთვის ნამდვილ გამოცდად იქცა.
ბაიდენმა ევროკავშირის ქვეყნებს რუსეთის წინააღმდეგ სანქციების გაგრძელებისკენ მოუწოდა და პირობა დადო, რომ ვიდრე თავად პუტინი არ შეცვლის პოზიციებს უკრაინის მიმართ და კონფლიქტის დასარეგულირებლად ქმედით ნაბიჯებს არ გადადგამს, აშშ თავის სანქციებს არ გააუქმებს.
