უკრაინის ჯანდაცვის მინისტრი ალექსანდრე კვიტაშვილი აცხადებს, რომ თანამდებობიდან მისი დათხოვის მიზნით აგორებული კამპანია არ უკვირს.
ამის შესახებ მან ტელეკომპანია РБК-Украина- ს ეთერში სატელეფონო ჩართვისას ისაუბრა.
,,ეს ნორმალურია, მე ჩემს წინააღმდეგ ასეთ მოქმედებას ველოდები და ნორმალურად აღვიქვამ. ეს პოლიტიკური პროცესია, როცა ისეთ ადამიანს უტევენ, ვისაც რაღაცის შეცვლა უნდა.” - განაცხადა კვიტაშვილმა.
მან აღნიშნა, რომ ოპონენტების ყველა პრეტენზიაზე არგუმენტირებული პასუხი და გათვლილი გეგმა აქვს.
მინისტრის თქმით, უცნაურია, რომ უკრაინელი დეპუტატების ცალკეული ჯგუფი მისი მოქმედების გამოძიებას ითხოვს და არა - 2014 წლის სატენდერო შესყიდვების კანონიერების შესწავლას.
,,მე დაჟინებით მოვითხოვ, რომ გამოძიება ნორმალურად ჩატარდეს.” - აღნიშნა ალექსანდრე კვიტაშვილმა.
შეგახსენებთ, რომ საქართველოს ყოფილი მაღალჩინოსანი ალექსანდრე კვიტაშვილი უკრაინის ჯანდაცვის მინისტრის პოსტზე 2014 წლის 2 დეკემბრიდან მუშაობს.
