იური ვაზაგაშვილის მკვლელობის საქმეზე წინასასამართლო სხდომა ბრალდებულ გია სოსანაშვილის მიმართ, თბილისის საქალაქო სასამართლოში დანიშნულია 2015 წლის 28 მაისს. მთავარი პროკურატურის ინფორმაციით, სხდომაზე მოსამართლემ მხარეების მიერ წარდგენილი მტკიცებულებების საფუძველზე უნდა განიხილოს საქმის არსებით სხდომაზე გადაცემის საკითხი, რის შემდეგაც სასამართლო სხდომები კვლავ თბილისის საქალაქო სასამართლოში გაგრძელდება.
რაც შეეხება გია სოსანაშვილის მიერ საბრძოლო მასალის მართლსაწინააღმდეგო შეძენა, შენახვა და ტარების ბრალდებას, იგი ძირითად საქმეს ცალკე წარმოებად გამოეყო და დანაშაულის ჩადენის ადგილის მიხედვით, 2015 წლის 05 მაისს განსახილველად გაიგზავნა გორის რაიონულ სასამართლოში. 2015 წლის 11 მაისს გორის რაიონულ სასამართლოში გაიმართა წინასასამართლო სხდომა, სადაც მოსამართლემ სრულად გაიზიარა ბრალდების მხარის მიერ წარდგენილი მტკიცებულებების მოპოვების კანონიერება, რის საფუძველზეც ჩათვალა რომ არ არსებობდა გია სოსანაშვილის მიმართ საქართველოს სსკ 236-ე მუხლის პირველი და მეორე ნაწილებით წარდგენილ ბრალდებაში დევნის შეწყვეტის საფუძველი და საქმე გადასცა არსებითად განსახილველად. აღნიშნული საქმის არსებითი განხილვა გორის რაიონულ სასამართლოში 2015 წლის 18 მაისს დაიწყება.
იური ვაზაგაშვილის მკვლელობის საქმეზე, გიორგი სოსანაშვილის მიმართ გამოძიება გრძელდება საქართველოს სსკ-ის 109-ე მუხლის პირველი ნაწილის „გ“ ქვეპუნქტით და ამავე მუხლის მესამე ნაწილის ,,ბ“ ქვეპუნქტით, რაც სასჯელის სახედ და ზომად ითვალისწინებს თავისუფლების აღკვეთას 16-დან 20 წლამდე ვადით ან უვადო თავისუფლების აღკვეთას.
შეგახსენებთ, გია სოსანაშვილის ადვოკატის სოსო ჯოგლიძის ინფორმაციით, საქმის განხილვა 18 მაისს გორის სასამართლოში უნდა გამართულიყო.
