ინფორმაცია იმის თაობაზე, არასრულწოვანი მსჯავრდებული იყო თუ არა, კონფიდენციალური იქნება, რადგან შემდეგ იმის გამო, რომ ერთხელ კანონი დაარღვია, არ შეექმნას მომავალში პრობლემები. ამის შესახებ პარლამენტის იურიდიულ საკითხთა კომიტეტის თავმჯდომარემ ვახტანგ ხმალაძემ განაცხადა.
მისი თქმით, კომიტეტის სხდომაზე დღეს, რამდენიმე მნიშვნელოვან კანონპროექტს განიხილავენ, მათ შორის, არასრულწლოვანთა მართლმსაჯულების კოდექსში შესატან ცვლილებებს. ასევე, შემოდის სასჯელის ისეთი სახეები, როგორიცაა შინაპატიმრობა, სათანადო ელექტრონული კონტროლი და განრიდება.
„ნასამართლობა არასრულწლოვნის მიმართ აღარ იქნება. ინფორმაცია იმის თაობაზე, არასრულწოვანი მსჯავრდებული იყო თუ არა, ეს კონფიდენციალური იქნება, რადგან შემდეგ იმის გამო, რომ ერთხელ კანონი დაარღვია, არ შეექმნას მომავალში პრობლემები“, - განაცხადა ვახტანგ ხმალაძემ.
რაც შეეხება ბრალდებულებს, მისი თქმით, მოსამართლე ვალდებული იქნება, იმ შემთხვევაში, თუ შუამდგომლობა არ იქნება დაყენებული, ორ თვეში ერთხელ განიხილოს პატიმრობის სახით თავისუფლების შეზღუდვის ღონისძიებების გამოყენების მიზანშეწონილობის საკითხი და ბრალდების მხარეს ექნება ვალდებულება, ორ თვეში ერთხელ დაასაბუთოს, რომ ამ პირის პატიმრობაში ყოფნა კვლავ აუცილებელია.
„ასევე, განისაზღვრება ვადა, რა ვადაშიც უნდა დასრულდეს სისხლის სამართლის საქმის განხილვა. იმ შემთხვევაში, თუკი აღკვეთის ღონისძიების სახით არ არის გამოყენებული პატიმრობა და რომ აღარ გვქონდეს უსაშველოდ გაჭიანურებული სისხლის სამართლის საქმეები“, - განაცხადა ვახტანგ ხმალაძემ.
ხოლო, რაც შეეხება ნარკოპოლიტიკის გატარებას, მისი თქმით, გასაღება ნარკოდანაშაულის ამ სახეობას გამოეყოფა, უფრო მკაცრად დაისჯება, ხოლო შენახვა-გადატანა უფრო მსუბუქად დასჯადი გახდება.
