ოკუპირებული ტერიტორიებიდან იძულებით გადაადგილებულ პირთა განსახლებისა და ლტოლვილთა მინისტრის სოზარ სუბარის განცხადებით, მნიშვნელოვანი იყო რომ მთავრობის მიერ დაგეგმილი ღონისძიებები არ გადადებულიყო და გრაფიკები არ არეულიყო.
მისივე თქმით, მთავრობის ფორმირებასთან დაკავშირებით, პრემიერსა და პრეზიდენტს შორის კომუნიკაცია არსებობდა.
"ამაზე არსებობდა წინასწარი კომუნიკაცია, როგორც პრემიერსა და პრეზიდენტს შორის, ისე უმრავლესობის ლიდერსა და პრეზიდენტს შორის. თითქოს ყველაფერი შეთანხმებული იყო და არ უნდა მომხდარიყო ეს არეულობა და გადადება. შესაბამისად, ჩვენ გადავწყვიტეთ, რომ ჩვენი მომავალი ვიზიტები დაგვეგეგმა, მთავრობა ჩვეულებრივად აგრძელებს მუშაობას, უბრალოდ შეიძლება მოხდეს ზოგიერთი ვიზიტის თარიღის შეცვლა. მე მაგალითად არ ვიცი როდის იქნება პარლამენტში დამტკიცებები და თუ დაემთხვევა ჩემს შეხვედრას, ბუნებრივია, მე მომიწევს ან გადადება ან ცვლილების შეტანა", - განაცხადა სუბარმა.
შეგახსენებთ, პრემიერმა ირაკლი ღარიბაშვილმა დღეს მთავრობის ახალი შემადგენლობა დაასახელა. პრეზიდენტმა გიორგი მარგველაშვილმა მთავრობის ახალ შემადგენლობაზე ხელმოწერა ერთი კვირით გადადო.
