პარლამენტის ვიცე-სპიკერი მანანა კობახიძე იუსტიციის ყოფილი მინისტრის ზურაბ ადეიშვილის ინტერპოლის ძებნილთა სიიდან შესაძლო ამოღებას ეხმიანება და აცხადებს, რომ იგი ბევრ დანაშაულშია ბრალდებული და ადეიშვილის საქართველოში ჩამოსვლისთანავე მას დააკავებენ.
,, მე ის ვიცი, რომ ამ ადამიანს ძალიან მძიმე დანაშაულებში ედება ბრალი და ის თუ ჩამოვა საქართველოს ტერიტორიაზე აუცილებლად დააკავებენ. Aამ შემთხვევაში რა ხდება ჩვენს საზღვრებს მიღმა არის თუ არა ძებნაში, ან ამოიღეს თუ არა ინტერპოლის სიიდან მე კონკრეტულად პასუხს ვერ გაგცემთ”, _აცხადებს ჟურნალისტებთან კობახიძე.
იუსტიციის ყოფილი მინისტრი ზურაბ ადეიშვილი ინტერპოლის ძებნილთა სიაში აღარ არის. როგორც ,,ჯი-ეიჩ-ენთან” საუბარში ადეიშვილის ადვოკატმა ოთარ კახიძემ განაცხადა, დაცვის მხარე ინტერპოლთან აწარმოებდა მოლაპარაკებებს ადეიშვილი ამოეღოთ ძებნილთა სიიდან, თუმცა ინტერპოლიდან ოფიციალური წერილი ჯერ არ მიუღიათ.
,,ინტერპოლის დევნილთა სიაში ზურაბ ადეიშვილი აღარ არის. დაცვის მხარე აწარმოებდა კომუნიკაციას ინტერპოლთან, რათა მოეხსნათ დევნილთა ცირკულარიდან ზურაბ ადეიშვილი. თუმცა ოფიციალური პასუხი ინტერპოლიდან არ მოგვსვლია, ველოდებით პასუხს და შემდეგ მოგახსენებთ რა და როგორ არის”, _განაცხადა ,,ჯი-ეიჩ-ენთან” საუბარში ოთარ კახიძემ.
მისივე განმარტებით, ინტერპოლს დაცვის მხარებ ბოლოს ოთხი თვის წინ მიმართა.
შეგახსენებთ, რომ იუსტიციის ყოფილი მინისტრის გვარი უკვე რამდენიმე დღეა ინტერპოლის ოფიციალურ ბაზაში აღარ იძებნება. ადეიშვილზე ინტერპოლით ძებნა 2013წლის 15 ნოემბერს გამოცხადდა.