დღევანდელი კანონმდებლობით, ნეპოტიზმის გამოვლინებები აკრძალულია, - ამის შესახებ პარლამენტის თავმჯდომარემ, დავით უსუფაშვილმა ჟურნალისტებს განუცხადა კითხვაზე - თუ რა მოსაზრება აქვს მას ნეპოტიზმის კრიმინალიზაციასთან დაკავშირებით "საერთაშორისო გამჭვირვალობა საქართველოს" საკანონმდებლო ინიციატივასთან დაკავშირებით.
"ის კანონები, რაც მიღებულია, უნდა დავიცვათ. დღევანდელი კანონმდებლობით ნეპოტიზმის გამოვლინებები არის აკრძალული. თუ ამას ვინმე არღვევს, იმისთვის დაწესებულია კონკრეტული პასუხისმგებლობა. საჯარო სამსახური უნდა იყოს გამჭვირვალე, მოსამსახურეების დასაქმება უნდა ეფუძნებოდეს შრომით უნარჩვევებს, პროფესიულ გამოცდილებას და სხვა ამ საკითხებს. ეს არის ძალიან მნიშვნელოვანი ამოცანა, რომელიც საკანონმდებლო დონეზე მოგვარებულია. მას სჭირდება შესრულება, აღსრულება. თუ ვინმე რაიმე უკეთესს და ეფექტურს გვთავაზობს, ჩვენ დიდი ყურადღებით განვიხილავთ", - განაცხადა დავით უსუფაშვილმა.
"საერთაშორისო გამჭვირვალობა საქართველომ" პარლამენტში შეიტანა კანონპროექტი ნეპოტიზმის კრიმინალიზებასთან დაკავშირებით, რომლის განხილვა იურიდიულ საკითხთა კომიტეტში დღეს იგეგმება.