"სადაზღვევო კომპანია აი სი ჯგუფის" წარმომადგენლები "აი სი ჯგუფსა" და შპს "ადითს" შორის მიმდინარე სასამართლო დავაზე მოსამართლის აცილების შესახებ შუამდგომლობას კიდევ ერთხელ დააყენებენ, - - აღნიშულთან დაკავშირებით დღეს პრესკონფერენცია გაიმართა, რომელსაც "აი სი ჯგუფის" გენერალური დირექტორის მოადგილე გიორგი შენგელია, იურიდიული სამსახურის უფროსი ეთერ ჟორჟოლიანი, ადვოკატი გოჩა სვანიძე და ქარელის საავადმყოფოს ხელმძღვანელი ზაქარია მეყანწიშვილი დაესწრნენ.
როგორც "აი სი ჯგუფის" წარმომადგენლები განმარტავენ, შპს "სადაზღვევო კომპანია აი სი ჯგუფსა" და შპს "ადითს" შორის დავა სამედიცინო მომსახურებების ხარჯების ანაზღაურებას ეხება, თუმცა "საქმეში უცნაურობები გამოიკვეთა".
მათი განცხადებით, სამედიცინო დაწესებულების მიერ გაწეული სამედიცინო მომსახურების ხარჯების ხელოვნურად გაზრდა ხდებოდა, რაც დადასტურდა კიდეც სადაზღვევო კომპანიის ინსპექტირების ჯგუფის მიერ ჩატარებული ინსპექტირებით.
"ამოღებულია მთელი რიგი ინფორმაცია და დოკუმენტაცია, რომელიც პირდაპირ ადასტურებს, რომ ხდებოდა სამედიცინო დოკუმენტაციის გაყალბება. მიუხედავად ამისა, "აი სი ჯგუფმა" "ადითს" შესთავაზა თანხების დაფარვა "ადითის" თანამშრომლებისთვის შრომის ანაზღაურების დავალიანების პირდაპირი დაფარვის გზით, ვინაიდან არსებობდა ვარაუდი, რომ "ადითი" აღნიშნულ თანხებს სხვა მიზნებისთვის გამოიყენებდა. ჩვენი ეჭვი გამძაფრდა მას შემდეგ, რაც "ადითმა" დაუსაბუთებლად უარი განაცხადა ასეთ შეთავაზებაზე", - განაცხადა ადვოკატმა გოჩა სვანიძემ.
მისივე თქმით, მიუხედავად იმისა, რომ "ადითსა" და "აი სი ჯგუფს" შორის ურთიერთობა გამომდინარეობს მხოლოდ სამედიცინო მომსახურების ხარჯების ანაზღაურებიდან, "ადითი" ყოვლად დაუსაბუთებლად ითხოვს რამდენიმე მილიონი ლარის ანაზღაურებას, რომელიც უკავშირდება იმ საინვესტიციო ვალდებულების შეუსრულებლობას, რომელიც საერთოდ არ წარმოადგენდა "ადითის" ვალდებულებას.
ადვოკატის თქმით, სასამართლომ დაუშვა უხეში "შეცდომა" და უზრუნველყოფის საშუალებებად გამოიყენა "აი სი ჯგუფის" შვილობილი კომპანიების ქონება, რომელთაც "ადითთან" არანაირი ურთიერთობა არ აკავშირებდათ, შესაბამისად, გოჩა სვანიძე მიიჩნევს, რომ სარჩელის უზრუნველყოფის ღონისძიება არ იყო გონივრული და არ ემსახურებოდა მოთხოვნის შესრულების მიზნებს.
"აღნიშნული დაადასტურა თბილისის სააპელაციო სასამართლომ და დაადგინა, რომ "აი სი ჯგუფის" ფინანსური მდგომარეობის (მყარი ფინანსური ინსტიტუტი) გათვალისწინებით პირველი ინსტანციის სასამართლოს მიერ გამოყენებული იქნა უზრუნველყოფის არა ის ღონისძიება, რომელიც უზრუნველყოფდა სარჩელს და მნიშვნელოვნად შემცირდა გამოყენებული უზრუნველყოფის საშუალების ფორმაც და მოცულობაც. საქმე იმაშია, რომ საქალაქო სასამართლოს მოსამართლემ, ბატონმა სულაკაძემ თავიდანვე მიიღო გადაწყვეტილება, რომელიც იურიდიული თვალსაზრისით სრული ნონსენსი იყო, მან "ადითის" მოთხოვნით ყადაღა დაადო არა მხოლოდ "აი სი ჯგუფის" ქონებას, არამედ "აი სი ჯგუფის" მონაწილეობით შექმნილ ყველა შვილობილი კომპანიის ქონებას. ამის შემდეგ "ადითმა" აქტიურად დაიწყო შვილობილ კომპანიებში წილის მოთხოვნა ყადაღის მოხსნის სანაცვლოდ, რაც არაერთხელ გაცხადდა სასამართლოს სხდომებზეც. ბუნებრივია, მას შემდეგ, რაც მოსამართლემ დაკარგა ნდობა თავისი გადაწყვეტილებებით, ჩვენ მივმართეთ იუსტიციის საბჭოს შესაბამისი საჩივრით და ასევე მოვითხოვეთ მოსამართლისგან აეცილებინა აღნიშნული დავა, შესაბამისი საჩივრის განხილვამდე, რაც ვფიქრობდით, რომ მისი მხრიდან საქმეში ობიექტურობის დადგენისთვის გადადგმული ბუნებრივი გადაწვეტილება იქნებოდა, მაგრამ ბატონმა სულაკაძემ ჩვენთვის გასაკვირად აცილებაზე კატეგორიული უარი განაცხადა", - აცხადებენ "აი სი ჯგუფში".
მათი ინფორმაციით, "ადითის" ძირითადი პარტნიორის, ლენა ლევინის ადვოკატი შუამდგომლობის წარდგენისას იყო დავით ასათიანი (უზენაესი სასამართლოს თავმჯდომარეობის ერთ-ერთი ყოფილი კანდიდატი), რომლის სახლის მისამართზეც ამჟამად არის დარეგისტრირებული შპს "ადითი".
"საგულისხმოა, რომ "ადითის" დამფუძნებელი იურიდიული პირი ისრაელშია რეგისტრირებული და ჩვენ მის საბოლოო ბენეფიციარ ფიზიკურ პირებამდე ვერ გავედით, თუმცა არ გაგვიკვირდება, თუ მასში ქართველ ფიზიკურ პირებს აღმოვაჩენთ, რომლებიც ამ სასამართლო პროცესში არიან ჩართულები ან მათთან დაკავშირებულ პირებს. რაც შეეხება ბატონი ასათიანისა და ბატონი სულაკაძის ურთიერთობებს, ჩვენთვის ცნობილი გახდა, რომ ისინი არიან მეგობრები (კლასელები) და ორივეს ქუთაისის მე-3 სკოლა აქვთ დამთავრებული, ორივე ერთსა და იმავე დროს სწავლობდა თსუ-ში საერთაშორისო სამართლის ფაკულტეტზე და მათი ოჯახის წევრები სოციალურ ქსელშიც არ მალავენ მეგობრობის ფაქტს. ასე, რომ დღეისათვის ჩვენთვის გასაგებია ბატონი სულაკაძის მოტივაციები გადწყვეტილებების მიღებისას. შესაბამისად, ჩვენ სამშაბათს კიდევ ერთხელ ვაპირებთ, ზემოთაღნიშნული ფაქტიდან გამომდინარე, დავაყენოთ შუამდგომლობა სასამართლოში ბატონი სულაკაძის აცილების თაობაზე", - აცხადებენ "აი სი ჯგუფში".
როგორც ადვოკატმა გოჩა სვანიძემ დასძინა, მაშინ როცა დღეს ქვეყანამ მართლმსაჯულების კუთხით მნიშვნელოვნად წინ უნდა წაიწიოს, იმ კუთხით, რომ მოხდა უზენაესი სასამართლოს ახალი თავმჯდომარის არჩევა და ეს არის პირველი ტალღა იმისა, რომ სასამართლოსადმი ნდობა გაიზარდოს, "მოსამართლის მიერ საქმის ასეთი ჩაბღაუჭება ამ ყველაფერს არ ემსახურება, მითუმეტეს, როდესაც კანონი მისი აცილების საშუალებას იძლევა".
