პოლიციელის მკვლელობაში ბრალდებული შალვა აბულაძის დაკავებას გამოეხმაურნენ უმცირესობის წარმომადგენლები. ოპოზიცია ხელისუფლებას პოლიციელების მხარდაჭერისკენ მოუწოდებს.
ნაციონალური მოძრაობის წევრის გივი თარგამაძის განცხადებით, თუ უკანონოდ დაკავებულ სპეცრაზმელებს არ გაათავისუფლებენ, თუ არ მოეხსნება განზრახ მკვლელობის ბრალდება ქუთაისში დაკავებულ პოლიციელს, სიტუაცია არ გამოსწორდება.
„სამწუხაროდ სიტუაცია არ გამოსწორდება, თუ არ იქნება სისხლის სამართლის პასუხისგებაში მიცემული ადამიანები, ვინც პოლიციელის მკვლელს საზღვარზე აპარებდა. ამიტომ, ჩვენ უნდა ვიყოთ თანმიმდევრულები და უნდა ვაიძულოთ ხელისუფლება, რომ შეცვალოს დამოკიდებულება კრიმინალთან მიმართებაში,“-განაცხადა ნაციონალური მოძრაობის წევრმა გივი თარგამაძემ.
პოლიციელების მხარდაჭერაზე საუბრობს თავისუფალი დემოკრატების წევრი ზურაბ აბაშიძეც.
„პოლიციას სჭირდება მხარდაჭერა და ზოგადად პოლიციას სჭირდება ის რომ, უფრო მეტად იყოს პროფესიული გადამზადება, მეტი მხარდაჭერა ჰქონდეთ სოციალური თვალსაზრისით,“-განაცხადა თავისუფალი დემოკრატების წევრმა ზურაბ აბაშიძემ.