გუშინ მოსკოვში რუსეთის საგარეო საქმეთა მინისტრმა სერგეი ლავროვმა და მისმა აფხაზმა ,,კოლეგამ” ვიაჩესლავ ჩირიკბამ რუსეთის საგარეო უწყებასა და ოკუპირებული აფხაზეთის საგარეო საქმეთა სამინისტროს შორის კოორდინირებული საგაერო პოლიტიკის მექანიზმების რეალიზაციის შესახებ მემორანდუმი გააფორმეს.
მემორანდუმის მიხედვით, ,,მხარეებმა” წარმოებული საგარეო პოლიტიკის თაობაზე ერთმანეთს ინფორმაცია რეგულარულად უნდა გაუცვალონ და ერთობლივი კონსულტაციები გამართონ.
ჩირიკბას განცხადებით, დიალოგმა პრობლემების მიმართ მათი პოზიციების თანხვედრა დაადასტურა და ისინი ,,ორ სახელმწიფოს” შორის მრავალმხრივი სამომავლო თანამრომლობისთვის განაწყო.
რაც შეეხება რუსეთ-საქართველოს ამჟამად ოკუპირებული საზღვრის, ფსოუს სასაზღვრო-გამშვები პუნქტის საკითხს, ჩირიკბამ აღნიშნა, რომ არსებული რეჟიმი ორი ,,მეგობარი ქვეყნის” ურთიერთობებს არ შეესაბამება.
,,ვიმედოვნებთ, რომ საზღვრის გადაკვეთის რეჟიმის გამარტივების შესახებ ჩვენს დაჟინებულ თხოვნას, ბოლოს და ბოლოს ყურად იღებენ და ამ მხრივ, კონკრეტული ნაბიჯები გადაიდგმება.
აფხაზეთი ტურისტული ქვეყანაა, ამიტომ საკურორტო სეზონზე საზღვარზე საათობით რიგში დგომა ჩვენთან მოხვედრის მსურველ ხალხზე ნეგატიურად მოქმედებს და შემდგომში სტუმრობის სურვილს უკარგავს.” - განაცხადა ვიაჩესლავ ჩირიკბამ.
მან ყურადღება ენგურის ხიდზე არსებულ ე. წ. საზღვარზეც გაამახვილა და ამ შემთხვევაში, პირიქით, თქვა, რომ კონტროლის კიდევ უფრო გამკაცრების მომხრეა.
,,მდინარე ენგურზე არსებული სახელმწიფო საზღვრის გამაგრება და დაცვა აუცილებელია, რათა საქართველოდან კონტრაბანდული საქონლის, იარაღის ან ნარკოტიკების შემოტანა არ მოხდეს და არალეგალური ემიგრაციაც გამოვრიცხოთ.” - აღნიშნა ოკუპირებული აფხაზეთის საგარეო საქმეთა მინისტრმა.