შს მინისტრი ვახტანგ გომელაური მიიჩნევს, რომ ფარულ მოსმენებთან დაკავშირებით ე.წ. გასაღები შსს უნდა დარჩეს, წინააღმდეგ შემთხვევაში ძალოვან უწყებას მუშაობა გაუჭირდება და ბევრი საქმის ოპერატიულად გახსნას ხელი შეეშლება.
"დაველოდოთ სასამართლოს პასუხს. თუმცა მოსმენები შსს-ს ეკუთვნის და თუ მანდ არ იქნება, მაშინ სად უნდა იყოს? ეს ძალიან ბევრ პრობლემას წარმოქმნის, მითუმეტეს, როცა არის საქმეები, რომლებიც სწრაფად გადაწყვეტას საჭიროებას. მაგალითისთვის, გაგახსენებთ ბავშვის გატაცებას ფულის გამოძალვის მიზნით. თუ არ იქნება რაღაც ბერკეტები, ჩვენ ძალიან გაგვიჭირდება და ძალიან ბევრი თემა გაფუჭდება: ტერორიზის კუთხით, ნარკოტიკებისა და ორგანიზებული დანაშაულის წინააღმდეგ ბრძოლის კუთხით. მე არ ვიცი ვის როგორ ესმის ეს საკითხი, მაგრამ რთულია როცა დამოკიდებული ვიქნებით 5-6 და 10 გასაღებზე", - აღნიშნა ვახტანგ გომელაურმა არასამთავრობო სექტორის გადაწყვეტილების შეფასებისას.
ფარული მიყურადების კანონს არასამთავრობო ორგანიზაციები საკონსტიტუციო სასამართლოში ასაჩივრებენ. სარჩელი მზად აქვთ კამპანიაში - ,,ეს შენ გეხება, ისევ გვისმენენ ”- ჩართულ არასამთავრობოებს და ის სასამართლოში უკვე გადაგზავნილია.
სამოქალაქო სექტორი ორ გასაღებიანი სისტემის გაუქმებას მოითხოვს.
