7 აპრილს 13:00 საათზე საქართველოს პარლამენტის ეროვნული ბიბლიოთეკა ქართული წიგნის ეროვნულ ცენტრთან თანამშრომლობის მემორანდუმს გააფორმებს.
მემორანდუმის თანახმად შეიქმნება უცხოენოვან თარგმანებში ქართული ლიტერატურის მონაცემთა ბაზა და ქართული ლიტერატურის უცხო ენებზე თარგმანებისა და მთარგმნელების შესახებ ინფორმაციის მოძიება ინტერნეტ სივრცეში გახდება შესაძლებელი.
ქართული ლიტერატურის თარგმანების პირველი სრულყოფილი ელექტრონული ბაზა ქართული წიგნის ეროვნული ცენტრისა და საქართველოს კულტურისა და ძეგლთა დაცვის სამინისტროს ინიციატივითა და მხარდაჭერით შეიქმნება. სპეციალურ ბაზაში თავმოყრილი იქნება სხვადასხვა დროს ნათარგმნი ქართული ლიტერატურული ნაწარმოებებისა და მთარგმნელების შესახებ ინფორმაცია.
ბაზის მოქნილი საძიებო სისტემა და სრულყოფილი ინფორმაცია ვებ-გვერდის საშუალებით ხელმისაწვდომი გახდება ნებისმიერი დაინტერესებული პირისთვის. აღსანიშნავია, რომ ქართული ლიტერატურის საზღვარგარეთ პოპულარიზაციისთვის ამ ბაზას უდიდესი მნიშვნელობა აქვს როგორც ქართველი ასევე უცხოელი გამომცემლებისთვის, ლიტერატურული აგენტებისთვის და მთარგმნელებისთვის.
ბაზა სრულყოფილ სახეს მიმდინარე წლის აგვისტოში მიიღებს და ის მუდმივად განახლებადი იქნება.
