მთავრობა ქვემო ქართლში არსებულ დაუმუშავებელ სახელმწიფო მიწებს მალე პოტენციურ ინვესტორებს შესთავაზებს. როგორც პრემიერ-მინისტრმა ”ძლიერი რეგიონი ძლიერი საქართველოსთვის“, - ახალი სამთავრობო პროექტის პრეზენტაცისას განაცხადა, რეგიონში არის განსაკუთრებით ბევრი მიწის ფართობი, რომლებიც არის სახელმწიფო საკუთრებაში და მათი ინვესტორებისთვის საპრივატიზაციოდ შეთავაზების შედეგად შესაძლებელია მასშტაბური პროექტების განხორციელება.
”მთავრობის ეკონომიკურმა საბჭომ საფუძვლიანად შეისწავლა ქვემო ქართლის ეკონომიკური პოტენციალი, ბუნებრივი და ადამიანური რესურსები და დღეს უკვე ვიცით, რა მიმართულებით და როგორ უნდა ვიმუშაოთ ამ რეგიონის გაძლიერებისთვის.
მინდა გითხრათ, რომ ქვემო ქართლის განვითარებისთვის გამოიკვეთა რამდენიმე ძირითადი მიმართულება:
პირველ რიგში, უნდა აღვნიშნო, რომ ქვემო ქართლში არის განსაკუთრებით ბევრი მიწის ფართობი, რომლებიც არის სახელმწიფო საკუთრებაში და მათი ინვესტორებისთვის საპრივატიზაციოდ შეთავაზების შედეგად შესაძლებელია მასშტაბური პროექტების განხორციელება.
ყველამ კარგად იცით, რომ ქვემო ქართლს გამორჩეული ადგილი უჭირავს სოფლის მეურნეობის ცალკეული პროდუქტების წარმოებაში. აქ არის ძალიან მნიშვნელოვანი ბაზა იმისათვის, რომ კიდევ უფრო განვითარდეს ხორცისა და ხილ-ბოსტნეულის გადამუშავება, რძის წარმოება, მეცხოველეობის პროდუქტის წარმოება, მებაღჩეობა-მებოსტნეობა, საკონსერვო წარმოება, არის ძალიან კარგი რესურსი სასაწყობე და სამაცივრე მეურნეობების განვითარების კუთხით”,- აღნიშნა პრემიერ-მინისტრმა.
ირაკლი ღარიბაშვილის განმარტებითვე, რეგიონის ეკონომიკური განვითარებისთვის შემდეგ მიმართულებად ინდუსტრიული წარმოება დაასახელა, რომელიც ძირითადად ბუნებრივ რესურსებს ეფუძნება.
”ეს არის პერსპექტიული მიმართულება, რადგან ქვემო ქართლი აწარმოებს მნიშვნელოვან საექსპორტო პროდუქციას. ამდენად, არსებობს ძალიან კარგი რესურსი ახალი წარმოების ორგანიზებისთვის და ახალი ტექნოლოგიების დანერგვის გზით არსებული საწარმოების გაფართოებისთვის.
რუსთავს აქვს განსაკუთრებული რესურსი ფოლადის, მინერალური სასუქების, თუჯის, ფეროშენადნობების, პლასტმასის ტარის, ლითონის სამშენებლო ნაკეთობების, არაორგანული ქიმიური ნივითიერებების, ტყავის წარმოების, ასევე ფქვილის, ლუდისა და გამაგრილებელი სასმელების წარმოების მხრივ.
ბოლნისს აქვს ტუფისა და ბაზალტის მოპოვება-დამუშავების რესურსი.
გარდაბანს აქვს რძის გადამუშავების, მებოსტნეობა-მებაღჩეობის პროდუქტების გადამუშავების, ასევე მატყლის, თევზის გადამუშავების რესურსი;
დმანისს აქვს ქვის მოპოვება-გადამუშავების რესურსი;
თეთრიწყაროს - ბაზალტისა და ყვითელი ტუფის ქვის მოპოვებისა და გადამუშავების რესურსი;
მარნეულს - ბაზალტის, მარმარილოს, თეთრი ქვისა და სხვა მინერალური რესურსების საბადოების გამოყენების, თხევადი ორგანული ბაქტერიული სასუქის წარმოების რესურსი;
წალკის რესურსი არის მიკროჰესები, საკონსერვო და ტყავის წარმოება, მარცვლეულის გადამუშავება, წისქვილების ამუშავება”,- აღნიშნა პრემიერ-მინისტრმა.
ქვემო ქართლშიძალიან მნიშვნელოვანი ინფრასტრუქტრული პროექტი ხორციელდება. როგორც პრემიერ-მინისტრმა მარნეულში ”ძლიერი რეგიონი ძლიერი საქართველოსთვის“, - ახალი სამთავრობო პროექტის პრეზენტაცისას განაცხადა, ეს გახლავთ თბილისი-რუსთავის ავტომაგისტრალის მშენებლობა.
მთავრობის მეთაურის განმარტებით, რუსთავში, მარნეულსა და გარდაბანში განსახორციელებელი პროექტების საინვესტიციო ღირებულება 38 მილიონ ლარს აჭარბებს.
”მინდა მივმართო ჩვენს ბიზნესმენებს, თქვენ გაქვთ ამ რეგიონში საინტერესო ბიზნესპროექტების განხორციელების შესაძლებლობა და მოგიწოდებთ, რომ ეს შესაძლებლობა მაქსიმალურად გამოიყენოთ”, აღნიშნა პრემიერ-მინისტრმა.
