ოკუპირებული აფხაზეთის ე. წ. მთავრობაში სტრუქტურული ცვლილებები მოსალოდნელი არ არის.
ამის შესახებ აფხაზ ჟურნალისტებს ოკუპირებული აფხაზეთის ახლადდანიშნულმა პრემიერ-მინისტრმა არტურ მექვაბიამ განუცხადა.
,,რადიკალური ცვლილებები არ იქნება, მაგრამ იმ ცვლილებებმა, რაც განხორციელდება, ეფექტური შედეგი უნდა მოგვცეს და მმართველობის პროცესის ოპტიმიზაციას შეუწყოს ხელი. გასულმა პერიოდმა კარგად დაგვანახა, სად შეინიშნება სუსტი რგოლები.” - განმარტა მექვაბიამ.
მისი ინფორმაციით, ოკუპირებული აფხაზეთის მინისტრთა კაბინეტის სტრუქტურაში შესატანი ცვლილებები მიმდინარე კვირას გახდება ცნობილი.
მექვაბია აცხადებს, რომ აფხაზეთის ე. წ. ხელისუფლებას თავისი ხედვები გააჩნია და მათ იციან, როგორც უნდა განვითარდეს ,,რესპუბლიკა,” თუმცა არსებობს გაუთვალისწინებელი ხელისშემშლელი პირობები.
,,ესაა რუბლის კურსის მკვეთრი დაცემა, ინფლაციის პროცესი, მაგრამ მიუხედავად ამისა, ჩვენ გვაქვს შანსი, მივაწოდოთ რუსეთს ჩვენი პროდუქცია, გავზარდოთ ექსპორტის ასორტიმენტი და რაოდენობა.” - აღნიშნა ოკუპირებული აფხაზეთის ახალმა პრემიერ-მინისტრმა.
მთავარ პრობლემებსა და უპირველესად მოსაგვარებელ საკითხებს შორის მან უმუშევრობა დაასახელა და იმედი გამოთქვა, რომ რამდენიმე წელიწადში ეს პრობლემა მოგვარდება.
,,მე არ ვიცი, რამდენ წელს ვიმუშავებ ამ პოსტზე, მაგრამ ჩემი მიზანია ისეთ ბაზას ჩავუყარო საფუძველი, რომელიც ქვეყნის მდგრად და წარმატებულ განვითარებას შეუწყობს ხელს.” - განაცხადა არტურ მექვაბიამ.
