ოკუპირებული ტერიტორიებიდან იძულებით გადაადგილებულ პირთა, განსახლებისა და ლტოლვილთა მინისტრი სოზარ სუბარი ,,ნაციონალური მოძრაობის” აქციის შეფასებებისას საბჭოთა კავშირს პერიოდს იხსენებს და აცხადებს, რომ დღეს უკვე ყველას აქვს უფლება, ჩაატაროს აქცია და გამოთქვას საკუთარი პროტესტი.
"საბჭოთა კავშირში არ გამოდიოდა ხალხი ქუჩაში და ეს იყო იმ ქვეყნის პრობლემა. ყველას აქვს უფლება, გამოვიდეს. მთავარია, რომ ჩვენ მათ ვუქმნით მაქსიმალურად კომფორტულ პირობებს და არ ვუშლით ხელს ისე, როგორც თვითონ გვიშლიდნენ," - აცხადებს სოზარ სუბარი.
შეგახსენებთ, რომ თბილისში, თავისუფლების მოედანზე აქციის მონაწილეებმა შეკრება უკვე დაიწყეს. საკრებულოს მიმდებარე ტერიტორიაზე ასევე იმყოფებიან ,,ნაციონალური მოძრაობის” ლიდერები:ხათუნა გოგორიშვილი, გიგი წერეთელი, ზურაბ ჭიაბერაშვილი ა.შ.
უკვე დასრულებულია აქციის საორგანიზაციო სამუშაოებიც. დამონტაჟებულია სცენა, სადაც განთავსებულია ბანერი წარწერით_ ,,საქართველოს შეუძლია წინსვლა” .
თავისუფლების მოედნის მიმდებარედ ასევე დამონტაჟებულია რამდენიმე დიდი მონიტორი.
აქციის მონაწილეებს ,,ნაციონალების” ლიდერებთან ერთად, ასევე მიმართავს საქართველოს ექსპრეზიდენტი მიხეილ სააკაშვილი.
,,ნაცმოძრაობის” ორგანიზებული აქცია თავისუფლების მოედანზე 16:00 საათზე დაიწყება.