ენერგეტიკის მინისტრმა, ვიცე-პრემიერმა კახა კალაძემ ოკუპირებული აფხაზეთის ტერიტორიაზე ,,ენგურჰესთან” დაკავშირებით გამართულ შეხვედრაზე განმარტება მთავრობის სხდომის შემდეგ გააკეთა. როგორც კალაძემ განმარტა აფხაზურ მხარესთან ენერგეტიკული მიმართულებით ძალიან კარგი თანამშრომლობა არსებობს.

"წლებია, დამყარებულია კარგი ურთიერთობა, ახლაც გრძელდება და დარწმუნებული ვარ, მომავალშიც გაგრძელდება. იქ მიმდინარეობს სარეაბილიტაციო სამუშაოები ვარდნილის ჰიდროელექტროსადგურებზე, კერძოდ არხის გაწმენდითი სამუშაოები. ჩვენ მოვინახულეთ აგრეგატები. იცით, რომ ჰიდროელექტროსადგურის აგრეგატები არის განთავსებული საბერიოში. დასრულებულია სარეაბილიტაციო სამუშაოები. 2016 წლისთვის ვგეგმავთ გვირაბის რეაბილიტაციას. ძალიან მასშტაბური სამუშაოები იქნება ჩასატარებელი და ამისთვის მნიშვნელოვანი და აუცილებელი იქნება ჰიდროელექტროსადგურის გაჩერება რამდენიმე თვით", - განაცხადა კახა კალაძემ.

კითხვაზე, იმ შემთხვევაში თუ გაჩერდება "ენგურჰესი", საიდან მიეწოდება აფხაზეთს ელექტროენერგია, კალაძემ განაცხადა, რომ საქართველოს ხელისუფლება იღებს ვალდებულებას ელექტროენერგიით მოამარაგოს ოკუპირებული აფხაზეთის ტერიტორიებზე მცხოვრები ადამიანები.

"თქვენ იცით რომ საქართველოს მთავრობა იღებს პასუხისმგებლობას ელექტროენერგიით მომარაგებაზე. აფხაზეთის ტერიტორიაზე მცხოვრებ ადამიანებს ჩვენ მივაწვდით ელექტროენერგიას ამ ყველაფერს სახელმწიფო თავის ხარჯზე იღებს. შარეაბილიტაციო სამუშაო, რომელიც იყო ჩატარებული, ტარდება და მომავალშიც ჩატარდება, ჩვენ ვიღებთ ამ ხარჯებს ჩვენს თავზე. იყო შემთხვევები, როდესაც პრობლემები ჰქონდა ენგურის ჰიდროელექტროსადგურს, ჩვენ რუსეთიდან შემოგვქონდა ელექტროენერგია და ვაწვდიდით აფხაზებს, რომ ჩაბნელებულები არ ყოფილიყვნენ ისინი", - განაცხადა საქართველოს ენერგეტიკის მინისტრმა, კახა კალაძემ.

შეგახსენებთ, რომ ოკუპირებულ აფხაზეთის ტერიტორიაზე ქართველი და აფხაზი ენერგეტიკოსების შეხვედრა გაიმართა. ამის შესახებ ინფორმაციას აფხაზური მედია ავრცელებს. 

მათივე ცნობით, შეხვედრაში მონაწილეობდნენ საქართველოს ენერგეტიკის სამინისტროს წარმომადგენლები, მინისტრი კახა კალაძე, მოადგილეები ილია ელოშვილი და მარიამ ვალიშვილი, ასევე, საქართველოს ენერგოსისტემის ხელმძღვანელი სულხან ზუმბურიძე.

აფხაზური მხრიდან შეხვედრას ესწრებოდნენ დეფაქტო ვიცე-პრემიერი, ენერგეტიკის, ტრანსპორტისა და კავშირგაბმულობის მინისტრი ვიქტორ ხილჩევსკი, "ჩერნომორენერგოს" გენერალური დირექტორი ასლან ბასარია, ე.წ. დეპუტატი ახრა ბჟანია, გალის რაიონის დეფაქტო ადმინისტრაციის უფროსი  თემურ ნადარია. 
აფხაზური მედიის ინფორმაციით, შეხვედრაზე, რ”ენგურჰესის” რეაბილიტაციის საკითხი იყო განხილული.