,,ნაცმოძრაობის” წევრი გიორგი გაბაშვილი პრეზიდენტის მიერ რიგგარეშე სხდომის მოწვევზე უარს ეხმიანება და იმედს გამოთქვამს, რომ საკანონმდებლო ორგანო მოითხოვს, მივიდეს მთავრობა და რიგგარეშე სხდომა ჩატარდეს.
,,სამწუხაროდ და პრეზიდენტის ინსტიტუტის სამარცხვინოდ, პარლამენტის საგანგებო სხდომა მოწვეული არ იქნა. შესაბამისად, საქართველოს კონსტიტუციის 61-ე მუხლის მე-2 პუნქტის და საქართველოს პარლამენტის რეგლამენტის 127-ე მუხლის მე3 პუნქტის თანახმად, თუ წერილობითი წარდგენიდან, 48 საათში მოწვევის აქტი არ გამოიცა, პარლამენტი იკრიბება მომდევნო 48 საათის განმავლობაში, რათა რიგგარეშე სხდომა გაიმართოს. ჩვენ მაინც ვიტოვებთ იმედს, რომ საქართველოს მთავრობის დამცინავი დამოკიდებულება საქართველოს მოსახლეობის მიმართ, რომ ისინი არც წარადგენენ და არც იხილავენ ანტიკრიზისულ გეგმას, პარლამენტი არ გამოავლენს ასეთ ცინიკურ დამოკიდებულებას და პარლამენტი მოითხოვს, მოვიდეს მთავრობა და რიგგარეშე სხდომა ჩატარდეს. ყველაფერი ის, რითიც დღეს მთავრობაა დაკავებული, არის ფუჭი, რომელიც საქართველოს ეკონომიკის ფუნდამენტურ პრობლემებს ვერ წყვეტს. შესაბამისად, ეს სხდომა აუცილებლად უნდა გაიმართოს”, -აცხადებს გაბაშვილი.
შეგახსენებთ, რომ პარლამენტის რიგგარეშე სხდომა ქვეყანაში შექმნილ ეკონომიკურ ვითარებაზე არ გაიმართება. აღნიშნული გადაწყვეტილება პრეზიდენტმა გიორგი მარგველაშვილმა მთავრობის ეკონომიკური გუნდის მინისტრებთან გამართული კონსულტაციის შემდეგ მიიღო.
პრეზიდენტი ფიქრობს, რომ ამ ეტაპზე რიგგარეშე სხდომის მოწვევა მიზანშეწონილი არ არის.
,,ეკონომიკური გუნდის მინისტრები ახლა ინტენსიურად მუშაობენ სავალუტო ფონდის მისიასთან, რომელიც საქართველოში იმყოფება და უახლოეს მომავალში, სავარაუდოდ სავალუტო ფონდის მისიის ვიზიტის დასრულებისთანავე, ქართულ საზოგადოებას წარმოუდგენენ სავალუტო სტაბილიზაციის მიმართულებით გასატარებელი მოკლე და საშუალოვადიანი ქმედებების გეგმას. სავალუტო ფონდის მისია საქართველოდან 4 მარტს მიდის, შესაბამისად, მიმაჩნია, რომ ჩვენ 5 მარტამდე უნდა მივცეთ დრო მთავრობის ეკონომიკურ გუნდს, რათა ძალიან კონკრეტულად წარმოუდგინოს საზოგადოებას თავიანთი ხედვა არსებული სირთულეების დაძლევის მიმართულებით", - აღნიშნა პრეზიდენტმა.
პრეზიდენტისგან რიგგარეშე სხდომის მოწვევას საპარლამენტო ოპოზიცია ითხოვდა.
"თავისუფალი დემოკრატები” და „ნაციონალური მოძრაობა” მთავრობისგან ეკონომიკური კრიზისიდან გამოსვლის სამოქმედო გეგმის წარდგენას და მოსახლობის კითხვებზე პასუხის გაცემას მოითხოვს.
