"თავისუფალი დემოკრატების" ლიდერი ირაკლი ალასანია მისი თანაგუნდელის ვიქტორ დოლიძის მიერ ვენაში ვიზიტის შეწყვეტას საქართველოში მიმდინარე მოვლენებს უკავშირებს. თუმცა თავდაცვის ყოფილ მინისტრს ირაკლი ალასანიას ,,იმედის” ეთერში დეტალები არ დაუკონკრეტებია და აღნიშნა, რომ დოლიძე განმარტებებს თავად გააკეთებს.
,,მას კონსულტაციები ჰქონდა ჩვენი პოლიტიკური საბჭოს რამდენიმე წევრთან. როგორც კი ჩამოვა, შედგება საბჭოს სრული შემადგენლობით შეხვედრა და შემდეგ უკვე თავად აცნობებს საზოგადოებას, რა ნაბიჯის გადადგმას აპირებს და რამ განაპირობა ვიზიტის შეჩერება", - განაცხადა ალასანიამ.
შეგახსენებთ, რომ გუშინ , ევროპასთან ინტეგრაციის კომიტეტის თავმჯდომარემ ვიქტორ დოლიძემ ოფიციალური ვიზიტი ვენაში შეწყვიტა და საქართველოში დაბრუნდა.
აღნიშნული გადაწყვეტილების მიზეზებზე კომენტარს მედიისთვის ვიქტორ დოლიძე საქართველოში დაბრუნების შემდეგ გააკეთებს.
18-20 თებერვალს, ავსტრიის დედაქალაქ ვენაში, ევროპის უშიშროებისა და თანამშრომლობის ორგანიზაციის (ეუთო) საპარლამენტო ასამბლეა იმართებოდა.
