ოკუპირებული აფხაზეთის ადმინისტრაციის ექსპერტთა დეპარტამენტის უფროსი ირაკლი ხინთბა ნატო-ს მიერ რუსეთისთვის აფხაზეთისა და სამხრეთ ოსეთის აღიარების გაუქმებისკენ მოწოდებას გამოეხმაურა.
,,რუსეთის მხრიდან ჩვენი ქვეყნის აღიარება არ გაუქმდება - მოეწონება ეს ნატო-ს თუ არა.
თუ ალიანსის წევრი ქვეყნები საქართველოსა და აფხაზეთს შორის არსებული წინააღმდეგობების რეალური მოგვარებით დაინტერესდებიან, მაშინ არაღიარების პოლიტიკის მხარდაჭერის ნაცვლად, უმჯობესია აფხაზეთის აღიარებაზე იმსჯელონ, რადგან ქართულ-აფხაზური სახელმწიფოთაშორისი ურთიერთოების მოგვარება, როგორც საქართველოს, ისე სხვა სახელმწიფოების მხრიდან, მხოლოდ აფხაზეთის აღიარების გზით არის შესაძლებელი." - განაცხადა ირაკლი ხინთბამ.
ხინთბას მიაჩნია, რომ ნატო ერთმანეთში ურევს რუსეთის უფრო მეტად გამწარების სურვილს, სამხრეთ კავკასიის საკითხებში უხარისხო ექსპერტიზას და საქართველოს მიმართ მორალურ მხარდაჭერას, რომელსაც ნატო-ს წევრობის რეალური პერსპექტივა არა აქვს.
,,არალოგიკურად გვეჩვენება, რომ ნატო თავის ავტორიტეტს ისეთი საკითხების განხილვაზე ხარჯავს, რომელიც არც მის მანდატში და არც მის გეოგრაფიულ არეალში შედის.
ვიდრე ალიანსი საქართველოსთან თანამშრომლობის სხავადსხვა ფორმატს გააძლიერებს და თავის ინფრასტრუქტურას საქართველოს ტერიტორიაზე შექმნის, ეს ქმედებები რეგიონში უფრო მეტად დაძაბავს სიტუაციას.
მთავარია, რომ აფხზეთი ნებისმიერი პროვოკაციული ავანტიურისგან დაცული იქნება. ამის გარანტი აფხაზეთსა და რუსეთს შორის დადებული ხელშეკრულებით გათვალისწინებული თავდაცვითი ღონისძიებები იქნება." - აღნიშნა ხინთბამ
შეგახსენებთ, რომ ოთხშაბათს, ბრიუსელში გამართულ ნატო-საქართველოს კომისიის შეხვედრაზე, ნატო-მ რუსეთს ოკუპირებული აფხაზეთისა და სამხრეთ ოსეთის აღიარების უკან გაწვევისკენ მოუწოდა.
