წუხელ, ოკუპირებული აფხაზეთის გალის რაიონის ზედა ზონის სოფელ რეფში სპეცოპერაციის ჩატარებისას აფხაზეთის ანტიტერორისტული ცენტრის თანამშრომელი ედუარდ ნერსესიანი და რუსეთის უშიშროების ფედერალური ბიუროს სასაზღვრო სამმართველოს სამხედრო მოსამსახურე ანდრეი უდალცოვი მოკლეს.
რუს მესაზღვრეებთან ერთად აფხაზმა სამართალდამცავებმა სპეცოპერაცია გალის რაიონის სოფელ ჭუბურხინჯის მკვიდრის, გელა გერგედავას გამტაცებელთა დასაკავებლად ჩაატარა.
გელა გერგედავას მტკიცებით, ის ოჯახისთვის თანხის გამოძალვის მიზნით რამდენიმე პირმა გაიტაცა, თუმცა მან ბოროტმოქმედებისგან თავის დაღწევა მოახერხა, გალის მილიციაში მივიდა და მომხდარისა და დამნაშავეთა ადგილსამყოფელის შესახებ აცნობა.
დამნაშავეთა ჯგუფსა და სამართალდამცავებს შორის შიარაღებული დაპირისპირებისას სამი ბოროტმოქმედიც დაიღუპა.
როგორც ოკუპირებული აფხაზეთის შინაგან საქმეთა მინისტრი, რაულ ლოლუა იტყობინება, მათი ვინაობა ცნობილია და ინფორმაციას მათი და სხვა თანამზრახველების შესახებ მედიას მალე გადასცემენ.
ფაქტზე გალის რაიონის პროკურატურამ სისხლის სამართლის საქმე ორი მუხლით (სამართალდამცავი ორგანოების თანამშრომლებზე თავდასხმასა და ცეცხლსასროლი იარაღის უკანონო შენახვისა და ტარების) აღძრა.