საარბიტრაჟო დავებთან დაკავშირებული სახელმწიფო ბაჟის ოდენობა მცირდება. აღნიშნულ ცვლილებას საქართველოს მთავრობის მიერ საკანონმდებლო ინიციატივის წესით წარმოდგენილი საქართველოს კანონის პროექტები: "არბიტრაჟის შესახებ" საქართველოს კანონში ცვლილების შეტანის თაობაზე", "სახელმწიფო ბაჟის შესახებ" საქართველოს კანონში ცვლილების შეტანის თაობაზე", "საქართველოს სამოქალაქო საპროცესო კოდექსში ცვლილების შეტანის შესახებ", "საქართველოს სისხლის სამართლის კოდექსში ცვლილების შეტანის შესახებ" (№07-2/280, 10.12.2014) ითვალისწინებს.
ხვალ, 13 იანვარს, საკანონმდებლო ინიციატივას, პარლამენტის ადამინის უფლებების დაცვის კომიტეტის სხდომაზე იუსტიციის მინისტრის პირველი მოანდილე სანდრო ბარამიძე წარადგენს.
კანონპროექტის თანახმად, მცირდება სახელმწიფო ბაჟის ოდენობა საარბიტრაჟო გადაწყვეტილების ცნობისა და აღსრულების შესახებ განცხადებისა და საარბიტრაჟო გადაწყვეტილების გაუქმების შესახებ საჩივრის განხილვისათვის; ასევე მცირდება სახელმწიფო ბაჟის ოდენობა იმ საკითხებზე, რომელშიც საარბიტრაჟო განხილვა საჭიროებს სასამართლოს ჩართულობას.
წარმოდგენილი ცვლილებებით, თუ საარბიტრაჟო შეთანხმების ორივე მხარე ფიზიკური პირია, მათ აღარ მოეთხოვებათ შეთანხმების სანოტარო წესით დამოწმება ან ადვოკატთა ხელმოწერა; არბიტრაჟის კომპეტენციის საკითხის გადაწყვეტას რაიონული (საქალაქო) სასამართლოს ნაცვლად განახორციელებს სააპელაციო სასამართლო.
