ავტომობილების ტექნიკური დათვალიერება მძღოლებს წელიწადში 50 ლარი დაუჯდებათ. 2015 წლის 1-ლი მარტიდან საქართველოში რეგისტრირებული ყველა კატეგორიის ავტოსატრანსპორტო საშუალება გზისთვის ვარგისობაზე სავალდებულო პერიოდულ ტესტირებას დაექვემდებარება. 2004 წლიდან მათთვის ტექნიკური მდგომარეობის განსაზღვრის მიზნით გზისთვის ვარგისობაზე ტესტირება ნებაყოფლობითია.
ავტომობილის ტექნიკური მდგომარეობის ევროსტანდარტებთან შესაბამისობა, ევროკავშირთან ასოცირების ხელშეკრულების ფარგლებში, საქართველოს მიერ აღებული ვალდებულებაა, მაგრამ მთავრობის გადაწყვეტილებას ავტომობილების ტექნიკური დათვალიერების შემოღებაზე ეკოლოგიური საფუძველიც აქვს.
მანქანების ტექდათვალიერებას გარემოზე გამონაბოლქვის მავნე ზემოქმედების შესამცირებლად არასაკმარისად მიიჩნევენ გარემოს საკითხებზე მომუშავე ორგანიზაციები და ისინი საწვავის ხარისხის კონტროლს აუცილებლად მიიჩნევენ.
