~ეროვნული საბჭოს~ საარჩევნო საბჭოს თავმჯდომარემ ზურაბ ნოღაიდელმა დღეს, გამართულ პრესკონფერენციაზე განაცხადა, რომ მაისის დასაწყისში მოსკოვში მისი რიგით მეშვიდე ვიზიტი იგეგმება. ზურაბ ნოღაიდელის თქმით, რუსეთის დედაქალაქში იგი რამდენიმე საკითხის განხილვას აპირებს.
"ჩემი დამსახურებით უკვე აღსდგა ჩარტერული ავიარეისები ორ ქვეყანას შორის. ახლა უკვე საუბარი იქნება რეგულარული საჰაერო ფრენების აღდგენაზე. ასევე ვიმსჯელებთ ქართული პროდუქციისთვის რუსული ბაზრის გახსნაზე. ძალიან დიდია იმის ალბათობა, რომ ორივე ეს საკითხი დადებითად გადაწყდება. გარდა ამისა, მოსკოვში განვიხილავთ კოდორის ხეობასა და ახალგორის რაიონში დევნილების დაბრუნების თემას", _ აღნიშნავს ზურაბ ნოღაიდელი.
პრესკონფერენციაზე ~ეროვნული საბჭოს~ საარჩევნო შტაბის ხელმძღვანელმა მისი თანაპარტიელის მიმართ ძალადობის გამოვლენის ფაქტზეც ისაუბრა. კერძოდ, ზურაბ ნოღაიდელის მტკიცებით, 6 აპრილს "სამართლიანი საქართველოსთვის" ფოთის საქალაქო ორგანიზაციის ხელმძღვანელს გია კორშაიას დაუკავშირდა ფოთის საკრებულოს წევრი "ნაციონალური მოძრაობიდან" დარეჯან ცქვიტარია და შეხვედრა სთხოვა. ნოღაიდელის თქმით, ეს უკანასკნელი მის თანაპარტიელს ფიზიკური ლიკვიდაციით დაემუქრა და "მოძრაობის" რიგების დატოვება მოსთხოვა.
პრესკონფერენციაში მონაწილეობდა ~ეროვნული საბჭოს~ წარმომადგენელი, ~ხალხის პარტიის~ ერთ-ერთი ლიდერი ალექსანდრე შალამბერიძე. კობა დავითაშვილის თანაპარტიელი მიესალმება ზურაბ ნოღაიდელის მიერ რუსეთთან ურთიერთობებში გადადგმულ ნაბიჯებს.
"ეს არის საქართველოს გადარჩენისკენ მიმართული ქმედებები", _ განაცხადა ალექსანდრე შალამბერიძემ.