თავდაცვის ყოფილი მინისტრის ბაჩო ახალაიას მეუღლე ანი ნადარეიშვილი საქალაქო სასამართლოს მოსამართლის ბესიკ ბუგიანიშვილის გადაწყვეტილებას ე. წ. ნავთლუღის სპეცოპერაციის საქმეზე გამოეხმაურა და აღნიშნა, რომ მოსამართლეს აქვს დავალება მიღებული რომ მათი ოჯახი ჩასვას ციხეში.
,, ბესიკ ბუგიანიშვილი არის მოსამართლე რომელმაც უკანონო გადაწყვეტილება მიიღო დათა ახალაიას საქმეში და მას მიუსაჯა უფლებამოსილების გადამეტება 4 წლით თავისუფლების აღკვეთის ვადით, რაც საბერძნეთის სასამართლომ უსაფუძვლოდ სცნო. მან დღეს გაასამართლა ბაჩო ახალაია არარსებული მტკიცებულებები და არარსებული მუხლით _წამების მუხლით, იგი ასამართლებს ასევე ჩემს ძმას ვაკო ნადარეიშვილს. მას პირდაპირ აქვს დავალება მიღებული და იგი მოექცა ამ ზემოქმედების ქვეშ და შეშინდა, რომ მთელი ჩვენი ოჯახი ჩასვას ციხეში", _განაცხადა ნადარეიშვილმა.
თბილისის საქალაქო სასამართლოს მოსამართლის ბესიკ ბუგიანიშვილის გადაწყვეტილებით, ე. წ. ნავთლუღის სპეცოპერაციის საქმეზე თავდაცვის ყოფილ მინისტრს ბაჩო ახალაის 7 წლითა და 6 თვით თავისუფლების აღკვეთა მიესაჯა. რაც შეეხება ამავე საქმეში სხვა ბრალდებულებს ლევან ქარდავასა და გიორგი მაზმიშვილს 11 წლიანი ხოლო მეგის ქარდავას 7 წლითა და 6 თვით პატიმრობა მიესაჯა.
შეგახსენებთ, რომ საქმე ეხება 2006 წლის 12 იანვარს ნავთლუღის ტერიტორიაზე ჩატარებულ სპეცოპერაციას, რომელსაც 3 ახალგაზრდის ლიკვიდაცია მოჰყვა. აღნიშნულ საქმეში ბრალდებულებს ლევან ქარდავასა და გიორგი მაზმიშვილს ბრალად განზრახ მკვლელობა ედებოდათ. ამ საქმეზე კიდევ ერთი ბრალდებულია კუდის ყოფილი უფროსი დათა ახალაია, რომლის საქმე ცალკეა გამოყოფილი და მასაც ასევე გაზრახ მკვლელობა ედება ბრალად.