20 ოქტომბერს ქ. ლუქსემბურგში, ევროკავშირის საგარეო საქმეთა საბჭოს სხდომის პარალელურად, დაგეგმილია საქართველოს საგარეო საქმეთა მინისტრის, მაია ფანჯიკიძის შეხვედრა ევროკავშირის 28 წევრი ქვეყნის საგარეო საქმეთა მინისტრთან.
შეხვედრაზე მხარეები განიხილავენ ევროკავშირთან თანამშრომლობის მიმდინარე პრიორიტეტებს და სამომავლო პერსპექტივებს, მათ შორის 2015 წლის რიგის სამიტის გეგმებს; ასოცირების ხელშეკრულების(ღრმა და ყოვლისმომცველი თავისუფალი სავაჭრო სივრცის კომპონენტის ჩათვლით) ხელმოწერის შემდეგ ევროკავშირთან განვითარებულ თანამშროლობას; საქართველოსა და ევროკავშირის შორის სავიზო რეჟიმის ლიბერალიზაციის პროცესს;
ევროკავშირის წევრი ქვეყნების საგარეო საქმეთა მინისტრებთან შეხვედრაზე საუბარი შეეხება საქართველოში უსაფრთხოებისა და სტაბილურობის საკითხებს. განსაკუთრებით ყურადღება გამახვილდება საქართველოს ოკუპირებულ ტერიტორიებზე, კერძოდ აფხაზეთის ოკუპირებულ რეგიონში განვითარებულ მოვლენებზე და იმ საფრთხეებზე, რასაც შეიცავს რუსეთის ფედერაციასა და საოკუპაციო რეჟიმს შორის მოკავშირეობის შესახებ შეთანხმების დოკუმენტი.
ქართული მხარის მიერ აღინიშნება ევროკავშირის როლის გააქტიურების მნიშვნელობა ქვეყანასა და რეგიონში სტაბილურობის ხელშეწყობის მიმართულებით.
აღსანიშნავია, რომ ამ ფორმატში ევროკავშირის საგარეო საქმეთა მინისტრებთან შეხვედრა წარმოადგენს საქართველოს ევროინტეგრაციის კურსისადმი ევროკავშირის და მისი წევრი ქვეყნების მხარდაჭერის კიდევ ერთ ნათელ დემონსტრირებას.
