საქართველოს ელჩმა ზაალ გოგსაძემ მონაწილეობა მიიღო პრაღის მერიაში გამართულ დისკუსიაში თემაზე „21 წელი რუსულ-ქართული კონფლიქტიდან". ღონისძიება პრაღის მერიისა და ჩეხური ორგანიზაცია „კულტურული პარტნიორობის" მიერ იყო ორგანიზებული.
ღონისძიებაში მონაწილეობა მიიღეს, ასევე, საქართველოს უშიშროების საბჭოს მდივნის მოადგილემ ივლიანე ხაინდრავამ, რადიო „თავისუფლების" ქართული რედაქციის თანამშრომელმა კობა ლიკლიკაძემ და ჩეხმა პუბლიცისტმა პეტრუშკა შუსტროვამ.
საქართველოს ელჩმა დამსწრე საზოგადოებას მიაწოდა ინფორმაცია საქართველოში მიმდინარე პროცესებზე, ქვეყნის საგარეო-პოლიტიკურ პრიორიტეტებზე და რუსეთ-საქართველოს შორის დღესდღეობით არსებულ ურთიერთობაზე. ელჩმა ღონისძიების მონაწილეებს ასევე, გააცნო საქართველოს მთავრობის ხედვა კონფლიქტებთან მიმართებით და მიაწოდა ინფორმაცია საქართველოს ოკუპირებულ ტერიტორიებზე არსებულ ვითარებასთანდაკავშირებით.
დისკუსიის მონაწილეებს რეგიონში არსებული გაყინული კონფლიქტების ანალიზი წარუდგინა უშიშროების საბჭოს მდივნის მოადგილემ ივლიანე ხაინდრავამ. მან ისაუბრა ამ კონფლიქტებთან დაკავშირებით რუსეთის პოზიციაზე და მის შესაძლო ზეგავლენაზე, როგორც საქართველოსა და უკრაინასთან, ასევე, სრულიად ევროპასთან მიმართებით.
ბ-ნმა კობა ლიკლიკაძემ დამსწრე საზოგადოებას გაუზიარა საკუთარი, როგორც სამხედრო კორესპონდენტის, გამოცდილება.

გამოსვლების შემდეგ, დისკუსიის მონაწილეებმა აუდიტორიის შეკითხვებს უპასუხეს.