ვაშინგტონში იუსტიციის მინისტრ თეა წულუკიანისა და მისი მოადგილე გოჩა ლორთქიფანიძის ვიზიტი დაიწყო. ქართულმა დელეგაციამ რამდენიმე მნიშვნელოვანი შეხვედრა გამართა. მათ შორის, დელეგაცია „ფრიდომ ჰაუსს" ეწვია, სადაც ორგანიზაციის ხელმძღვანელებს შეხვდა.
საქართველოს იუსტიციის მინისტრის განცხადებით, გავლენიანი საერთაშორისო ორგანიზაცია ადამიანის უფლებათა დაცვის მხრივ საქართველოში განხორციელებულ რეფორმებს მაღალ შეფასებას აძლევს. ადამიანის უფლებების დაცვის თვალსაზრისით ყველაზე წარმატებულ რეფორმებად მინისტრის მიერ მართლმსაჯულების, სასჯელაღსრულების და საარჩევნო სფეროებში გატარებული რეფორმები დასახელდა. „ფრიდომ ჰაუსთან" საუბარში ყურადღება დაეთმო მომავლის საკითხებსაც, მათ შორის, პირადი ცხოვრების დაცულობის მხრივ გასატარებელ რეფორმას.
შეხვედრა გაიმართა, ასევე, დემოკრატიის ნაციონალური ფონდის, „USAD"-ის ევროპისა და აზიის ბიუროს ხელმძღვანელებთან. იუსტიციის მინისტრი და მისი მოადგილე დღესვე ამერიკის შეერთებული შტატების ვიცეპრეზიდენტის ოფისის წარმომადგენლებს შეხვდნენ და სამართლის სფეროში მიმდინარე და დაგეგმილი რეფორმების შესახებ მიაწოდეს ინფორმაცია.
დღის ბოლოს თეა წულუკიანი აშშ-ის გენერალური პროკურორის სახელით გამართულ მიღებას დაესწრო.
ხვალ კი, ქართული დელეგაცია ამერიკის იუსტიციის დეპარტამენტის მიერ ორგანიზებული ყოველწლიური კონფერენციის მუშაობაში მიიღებს მონაწილეობას, რომელიც ბავშვთა მიმართ ძალადობის საკითხებს ეძღვნება.
