საქართველოს საგარეო საქმეთა მინისტრმა, მაია ფანჯიკიძემ მონაწილეობა მიიღო ამერიკა-ადრიატიკის და ამერიკა-ბალტიის ფორმატის შეხვედრაში. მინისტრების დონეზე სამუშაო ვახშამი ქ.ნიუ-იორკში, გაეროს გენერალური ასამბლეის ფარგლებში გაიმართა. შეხვედრას ალბანეთის საგარეო საქმეთა მინისტრი უძღვებოდა.

სამუშაო შეხვედრაზე საგარეო საქმეთა მინისტრებმა ევროატლანტიკური უსაფრთხოების საკითხები, უკრაინაში არსებული ვითარება, ასევე ბალტიისა და ადრიატიკის რეგიონში მიმდინარე პროცესები განიხილეს. იმსჯელეს ნატო-ს უელსის სამიტის შედეგებზე და უსაფრთხოების მხრივ მსოფლიოში არსებულ ვითარებაზე, მათ შორის სირიასა და ერაყში შექმნილ მდომარეობაზე. მინისტრებმა ასევე შეაფასეს გაეროს გენერალურ ასამბლეაზე ამერიკის შეერთებული შტატების პრეზიდენტის ბარაკ ობამას გამოსვლა და საერთაშორისო უსაფრთხოების საკითხებთან დაკავშირებით შეერთებული შტატების მიერ გაჟღერებული გზავნილები.

საგარეო საქმეთა მინისტრების შეხვედრაზე სიტყვით გამოსვლისას მაია ფანჯიკიძემ ხაზი გაუსვა საქართველოს ევროატლანტიკური ინტეგრაციის მნიშვნელობას. ისაუბრა უელსის სამიტზე მიღებულ გადაწყვეტილებაზე საქართველოსთვის სპეციალური პაკეტის გადმოცემის თაობაზე და მის იმპლიმენტაციასთან დაკავშირებულ საკითხებზე. ასევე მინისტრმა კოლეგებს ინფორმაცია მიაწოდა იმასთან დაკავშირებით, თუ როგორ მიმდინარეობს ასოცირების შეთანხმების, კერძოდ მისი ეკონომიკური ნაწილის ღრმა და ყოვლისმომცევლი თავისუფალი სავაჭრო სივრცის შეთანხმების იმპლიმენტაციის პროცესი. აღსანიშნავია, რომ საქართველოს საგარეო საქმეთსა მინისტრმა გაეროს ასამბლეის ფარგლებში ამერიკა-ბალტიის, ამერიკა-ადრიატიკის ფორმატის შეხვედრაში მონაწილეობა უკვე მეორედ მიიღო.