საქართველოს საგარეო საქმეთა სამინისტროში საქართველო-აშშ-ს ეკონომიკური თანამშრომლობის საკითხებზე გაიმართა შეხვედრა, რომელშიც მონაწილეობა მიიღეს საქართველოს პრემიერ-მინისტრის ოფისთან არსებულმა ეკონომიკური საბჭოს, საქართველოს ეკონომიკისა და მდგრადი განვითარების სამინისტროს, საქართველოში აშშ--ს საელჩოსა და საქართველოში USAID-ის ოფისის წარმომადგენლებმა.
შეხვედრის ფარგლებში 2014 წლის პირველ ნახევარში საქართველო-აშშ-ს ეკონომიკური თანამშრომლობის კუთხით შესრულებული სამუშაოები შეჯამდა და სტრატეგიული თანამშრომლობის შემდგომი გაღრმავების პერსპექტივებზე გამახვილდა ყურადღება. განხილულ იქნა 15-19 ივლისს საქართველოში ეროვნული უსაფრთხოების საკითხებზე ეკონომიკურ მრჩეველთა ჯგუფის (Business Executives for National Security) 27 ივნისს აშშ-ს სავაჭრო წარმომადგენლის (US Trade Representative) და აშშ-დან სხვა მნიშვნელოვანი დელეგაციების საქართველოში ვიზიტის შედეგები.
მხარეებმა ორი ქვეყნის ბიზნესის წარმომადგენლებს შორის ურთიერთობების განვითარების მიზნით, სხვადასხვა ხელშეწმყობი ღონისძიებების ჩატარების თემებიც განიხილეს. აღინიშნა ამერიკული სავაჭრო მისიის ვიზიტის მნიშვნელობაც საქართველოში, რომელიც მიმდინარე წლის ბოლოს-2015 წლის დასაწყისში შედგება.
"შეხვედრების ეს ფორმატი სასარგებლოა არა მარტო ამერიკულ მხარესთან მოსაზრებების გაცვლის თვალსაზრისით, არამედ შიდა კოორდინაციის ამაღლების თვალსაზრისითაც, ვინაიდან შეხვედრას საგარეო საქმეთა სამინისტროს წარმომადგენლებთან ერთად ესწრებოდნენ საქართველოს ეკონომიკისა და მდგრადი განვითარების სამინისტროს, ასევე პრემიერ-მინისტრთან არსებული ეკონომიკური საბჭოს წარმომადგენლები. ყველაფერი ეს შესაბამის უწყებებს დაეხმარა უფრო კოორდინირებული პოზიციები ჩამოეყალიბებინათ ისეთ სტრატეგიულ პარტნიორთან სავაჭრო-ეკონომიკური ურთიერთობების საკითხის ირგვლივ, როგორიც აშშ-ა. ამასთან ამერიკელ კოლეგებთან შევთანხმდით, რომ საჭიროა პრაქტიკული ნაბიჯების აქტიურად გადადგმა, რათა ჩვენს შორის სტრატეგიულმა თანამშრომლობამ, მათ შორის ბუნებრივია ეკონომიკის სფეროშიც, კონკრეტული შედეგები მოიტანოს." - განაცხადა შეხვედრის შემდეგ საგარეო საქმეთა სამინისტროს საერთაშორისო ეკონომიკურ ურთიერთობათა დეპარტამენტის დირექტორმა, იოსებ ნანობაშვილმა
„ჩვენ ყოველთვის ვმუშაობთ აშშ-ს ორმხრივი ურთიერთობების გაღრმავებაზე ვაჭრობისა და ინვესტირების კუთხით. მიგვაჩნია რომ შევძლებთ საქართველოს ეკონომიკური ზრდის ხელშეწყობას. ერთ-ერთი ასეთი მიმართულება სტრატეგიული პარტნიორობის კომისიაში არსებული ეკონომიკური სამუშაო ჯგუფის შეხვედრაა, რომელიც მომავალ თვეში თბილისში გაიმართება. ასევე ხელს ვუწყობთ საქართველოს მთავრობის ძალისხმევას, რათა თბილისში რეგიონალური ეკონომიკისა და ინვესტირების კონფერენცია ჩატარდეს. ქვეყნის ეკონომიკური განვითარება განსაკუთრებით პრიორიტეტულია ასოცირების ხელშეკრულებისა და ღრმა და ყოვლისმომცველი სავაჭრო სივრცის შეთანხმების ხელმოწერის შემდეგ. ჩვენ გვსურს ხელი შევუწყოთ საქართველოს ეკონომიკურ ზრდას" - აღნიშნა საქართველოში აშშ-ს საელჩოს პოლიტიკური და ეკონომიკური საკითხების დეპარტამენტის ხელმძღვანელის მოადგილემ ქეიჯი მურმა.
