აშშ-ში დღეს საქართველოსთვის, უკრაინისა და მოლდოვისათვის ნატოს ბლოკის გარეშე მოკავშირის სტატუსის მინიჭების კანონპროექტის დამტკიცებას აპირებენ. ინფორმაცია ამის შესახებ აშშ-ს სენატის ოფიციალურ გვერდზეა გამოქვეყნებული.
კანონპროექტი ასევე ითვალისწინებს უკრაინისათვის თავდაცვითი იარაღის მიწოდებას, მათ შორის - ტანკსაწინააღმდეგო, ჯგუფური იარაღისა და ამუნიციის. ასევე, რადიოლოკაციური სისტემების მიწოდებას მოწინააღმდეგის პოზიციების გამოსავლენად.
გათვალისწინებულია უპილოტო მზვერავი თვითმფრინავებისა და კავშირგაბმულობის სისტემების მიწოდებაც. ამისათვის აშშ-ს ბიუჯეტიდან 2015 წლისათვის 350 მილიონი აშშ დოლარის გამოყოფა იგეგმება.
დოკუმენტით ასევე გათვალისწინებულია, აშშ-ს მთავრობის მიერ 10 მილიონი აშშ დოლარის გამოყოფა მომდევნო სამი წლის განმავლობაში რუსული პროპაგანდისათვის წინააღმდეგობის გასაწევად ყოფილი საბჭოთა კავშირის ქვეყნებისათვის.
