„ნაციონალური მოძრაობის" წევრმა გივი თარგამაძემ პარლამენტის სხდომაზე ე.წ. „კანონიერი ქურდის" დაკავება მოითხოვა.
„არსებობს 38 წელს დაბადებული ფრიდონ ბარკალაია. ის არის კანონოიერი ქურდი. თქვენი ხელისუფლებაში მოსვლის დღიდან ის ინტენსიურად მოძრაობს საქართველოში, შემოდის და გადის თავისუფლად თავისი პასპორტით. ამ წუთებში ის სენაკშია, მისი მეტსახელია ცანციკა. კეთილი ინებოს პოლიციამ და ეხლავე მოძებნოს ის სენაკში და დააკავოს. ძალიან კონკრეტული საქმეა. ლუდზე კი არ დააკავოს, არამედ იმაზე, რაზეც დასაკავებელია", - განაცხადა გივი თარგამაძემ.
დეპუტატს სოციალურ ქსელში უპასუხა შსს-ს საზოგადოებასთან ურთიერთობის დეპარტამენტის ხელმზღვანელმა ნინო გიორგობიანმა და განმარტა, რომ პიროვნება, რომელზედაც თარგამაძე აპელირებს, 77 წლისაა და არ არის ქურდული ტრადიციების მიმდევარი.
„ერთ-ერთმა დეპუტატმა განაცხადა, რომ კანონიერი ქურდი - ზედმეტსახელად „ცანციკა" ანუ ფრიდონ ბარკალაია სენაკში იმყოფება და მოგვიწოდა, რომ დავაკავოთ. მინდა განვმარტო, რომ აღნიშნული პირი არ არის კანონიერი ქურდი. ის 77 წლისაა და მთელი ცხოვრება სენაკში ცხოვრობს. რატომ შეჰყავს შეცდომაში დეპუტატს მოსახლეობა პარლამენტის ტრიბუნიდან?!", - აცხადებს გიორგობიანი.
ცნობისთვის, ფრიდონ (ცანციკო) ბარკალია, 4 ათეული წელია ცხოვრობს სენაკში, ჰყავს ოჯახი და იგი ქურდული ტრადიციების მიმდევარი არ არის. მას თავის დროზე მოხდილი აქვს სასჯელი კონკრეტულ სისხლის სამართლის დანაშაულზე. უნდა აღინიშნოს, რომ ფრიდონ (ცანციკო) ბარკალია, სენაკში ცხოვრობდა განვლილი წლების განმავლობაში და მის მიმართ „ნაციონალური მოძრაობის" ხელისუფლებას სამართლებლივი პრეტენზიები არ ჰქონია.
