,,საერთაშორისო გამჭვირვალობა - საქართველო" ერიოდულად აქვეყნებს ინფორმაციას საქართველოს პარლამენტის წევრების ქონებრივი მდგომარეობის შესახებ. ამჯერად ორგანიზაციამ, ქონებრივ დეკლარაციებზე დაყრდნობით დეპუტატებისა და მათი ოჯახის წევრების მფლობელობაში მყოფ მანქანებზე შეაგროვა ინფორმაცია.
,,საერთაშორისო გამჭვირვალობა - საქართველოს" ცნობით, დეპუტატები ვალდებულები არიან, დეკლარაციაში მიუთითონ მოძრავი ქონება, თუ მისი ღირებულება 10 000 ლარს აღემატება. ქონებრივი დეკლარაციების მიხედვით, შეუძლებელია იმის დადგენა, თუ რა არის კონკრეტული ნივთის ზუსტი ღირებულება. ფაქტობრივად, დეკლარაციის შემვსები თავად განსაზღვრავს, აღემატება თუ არა მისი ავტომობილის ღირებულება 10 000 ლარს.
ამასთან ავტომობილის მფლობელობა დეკლარაციებში დეპუტატების დაახლოებით ნახევარს აქვს მითითებული, თუმცა ზოგ შემთხვევაში მანქანის მფლობელებად პარლამენტარების ოჯახის წევრები არიან მოხსენიებული. არის დეკლარაციები, სადაც არ არის დაკონკრეტებული მანქანის გამოშვების წელი ან მწარმოებელი.
პარლამენტარებს შორის ავტომობილის ყველაზე პოპულარული მარკები Mercedes, Toyota, BMW, Volkswagen და Toyota LEXUS-ია.
2010 წლის შემდეგ გამოშვებული ავტომობილი პარლამენტის სულ 6 წევრს აქვს. 16 დეპუტატს და მათ ოჯახის წევრებს კი ერთზე მეტი ავტომობილი აქვთ. მათ შორის, ყველაზე მეტი, 7 ავტომობილი საპარლამენტო უმცირესობის დეპუტატს კობა ნაყოფიას და მისი ოჯახის წევრებს აქვთ.
ორაგანიზაციის ცნობით, ყველაზე ახალი მარკის ავტომობილები ჰყავთ უმცირესობის დეპუტატებს აზერ სულეიმანოვს, გივი თარგამაძეს, გურამ მისაბიშვილს, გიორგი გაბაშვილს, კობა ნაყოფიას, ხოლო უმრავლესობის დეპუტატებიდან ალი მამედოვს.
ამასთან ,,საერთაშორისო გამჭვირვალობა - საქართველოს" ინფორმაციით, ყველაზე ძველი მანქანა უმცირესობის დეპუტატს გიორგი კარბელაშვილს აქვს და ის 1949 წელსაა გამოშვებული.
