პარლამენტის თავმჯდომარე დავით უსუფაშვილი, საპარლამენტო დელეგაციასთან ერთად, ოსლოში ნორვეგიის სტორტინგის (პარლამენტის) პრეზიდენტს, ომელიკ თომესენს შეხვდა. როგორც ,,ჯი-ეიჩ-ენს" საკანონმდებლო ორგანოდან აცნობეს შეხვედრაზე საუბარი შეეხო საქართველო-რუსეთის ურთიერთობებს. ამ კონტექსტში ნორვეგიის პარლამენტის თავმჯდომარემ აღნიშნა: „ჩვენ ვხედავთ, რომ საქართველომ სხვადასხვა მიმართულებით ძალიან ბევრ დადებით შედეგს მიაღწია, მაგრამ დიდი მეზობელი დღემდე ერთ-ერთ ძირითად გამოწვევად რჩება."
საუბარი შეეხო უკრაინაში მიმდინარე პროცესებს. ამ საკითხთან მიმართებაში ქართულმა მხარემ იმედი გამოთქვა, რომ საერთაშორისო საზოგადოება არ დაიშურებს ძალისხმევას იმისათვის, რომ მეტი სანქციები იქნეს გატარებული რუსეთის წინააღდეგ. საქართველოსთვის ნატო-ს უელსის სამიტის შედეგებზე საუბრისას ბატონმა თომესენმა აღნიშნა: „ჩვენ ვიმედოვნებთ, რომ თქვენ გამონახავთ გზას ევროკავშირის, ნატო-სა და სხვა თქვენთვის საინტერესო ორგანიზაციებისკენ და ამ გზაზე ნორვეგია თქვენ გამოგყვებათ როგორც მეგობარს."
გარდა ზემოაღნიშნული საკითხებისა, ნორვეგიის სტორტინგის პრეზიდენტი დაინტერესდა საქართველოს კონფლიქტურ რეგიონებში არსებული სიტუაციითაც.
შეხვედრის დასასრულს კი მხარეებმა ისაუბრეს საქართველოსა და ნორვეგიას შორის არსებულ საპარლამენტო ურთიერთობებზე და ამ ურთიერთობების განვითარების გზებზე.
