პოლიტიკური ოპონენტების მხრიდან დანერგილი ტერმინი - „რეიდი" მიმართულია იმისკენ, რომ მოქალაქეებს გაუჩნდეთ გარკვეული ნეგატიური ასოციაცია ბნელ წარსულთან, - ამის შესახებ საქართველოს პრემიერ-მინისტრმა ირაკლი ღარიბაშვილმა ჟურნალისტებს გურჯაანში, თემის კომენტირებისას განუცხადა.
მთავრობის მეთაურის შეფასებით, ეს არის ჩვეულებრივი, ევროპაში აპრობირებული საპოლიციო კონტროლი და პრევენციული ღონისძიებები, რომლის გატარების სრული უფლება აქვს პოლიციას.
„როდესაც მოვედით ხელისუფლებაში, მე ვიყავი სამინისტროში პოლიტიკის რადიკალურად შეცვლის ინიციატორი. ძალიან კარგად გახსოვთ რა დაგვხვდა ჩვენ - კუდ-ი, სოდ-ი. სრული რეორგანიზაცია ჩავატარეთ სამინისტროში. ჩემი მთავარი პრინციპები იყო - კანონიერება, სამართლიანობა და ჰუმანურობა. ამ სამი პრინციპის დამცველები ვართ და ვიქნებით მუდამ. მინდა, კიდევ ერთხელ მოვუწოდო პოლიციელებს, მაქსიმალურად გაამკაცრონ კონტროლი. მათ აქვთ ამის სრული უფლება კანონით მინიჭებული და ის ისტერიკა, რაც ამ დღეებში გვესმოდა, მიმართული იყო პირადად მინისტრის და მთელი სამინისტროს დისკრედიტაციისკენ", - განაცხადა პრემიერ-მინისტრმა.
ირაკლი ღარიბაშვილის განმარტებით, პროცესი მაქსიმალურად გამჭვირვალეა და მისი მიზანია ის, რომ მოქალაქეებს ჰქონდეთ სიმშვიდის განცდა. პრემიერმა ხაზგასმით აღნიშნა, რომ სიტუაცია კონტროლის ქვეშ არის და პრევენციული ღონისძიებები მიმართულია მეტი წესრიგისა და დისციპლინისკენ.
„პოლიციელებს აქვთ სრული უფლება, ნებისმიერ კანონდარღვევაზე მოახდინონ მაქსიმალურად მკაცრი რეაგირება. კრიმინალთან ბრძოლაში ჩვენ ვართ აბსოლუტურად უკომპრომისო და არავითარი დათმობა არ იქნება", - აღნიშნა პრემიერმა.
ირაკლი ღარიბაშვილმა ასევე კომენტარი გააკეთა გაერო-ს გენერალურ ასამბლეაზე საქართველოდან ორი დელეგაციის შესაძლო გამგზავრების შესახებ და აღნიშნა, რომ მთავრობამ ამ საკითხზე რამდენიმე თვის წინ იმსჯელა.
„გადაწყდა, რომ ვინაიდან პრემიერ-მინისტრი არის აღმასრულებელი ხელისუფლების ხელმძღვანელი, გაეროს სამიტზე გაემგზავრება მთავრობის მეთაური. განსაზღვრულია დელეგაციის შემადგენლობა, ჩვენ თვეების წინ დავადასტურეთ ყველაფერი", - აღნიშნა პრემიერმა.
ჟურნალისტებთან საუბრისას საქართველოს მთავრობის მეთაურმა კმაყოფილება გამოთქვა რთველის მიმდინარეობასთან დაკავშირებით და განაცხადა, რომ წელს, სავარაუდოდ ყურძნის მოსავალი 100 ათას ტონას გადააჭარბებს. პრემიერი მოხარულია, რომ ბაზარზე ყურძნის უპრეცენდენტოდ მაღალი ფასები ფიქსირდება, რადგან ეს გლეხს მეტ შემოსავალს მისცემს.
