ქართული ენის (აფხაზეთში - აგრეთვე, აფხაზური ენის) სახელმწიფო სტატუსის განმტკიცება და სახელმწიფოებრივი და საზოგადოებრივი ცხოვრების ყველა სფეროში მის გამოყენებაზე, დაცვაზე, განვითარებაზე, შესწავლასა და პოპულარიზაციაზე განუხრელად ზრუნვა მალე კანონმდებლობით იქნება განსაზღვრული. ამისათვის მოწოდებულია კანონპროექტი „სახელმწიფო ენის შესახებ", რომელიც პარლამენტში უკვე ინიცირებულია და იგი ადამიანის უფლებათა დაცვისა და სამოქალაქო ინტეგრაციის კომიტეტის დღევანდელ სხდომაზე ზოგადი პრინციპების დონეზე განიხილეს. როგორც ,,ჯი-ეიჩ-ენს" საკანონმდებლო ორგანოდან აცნობეს „კანონპროექტი შესაბამისობაშია კონსტიტუციასთან და იგი მიმართულია იმ მთავარი ღირებულების დაცვისკენ, რომელიც არის ქართული თვითმყოფადობის გამომხატველი - ქართული ენა. ამ კანონპროექტში ხდება თავმოყრა იმ ვალდებულებების, რაც არის უკვე გაწერილი სხვადასხვა ნორმატიულ აქტებში ენასთან მიმართებაში. მაგ. ქართული ენის გამოყენება სამართალწარმოებაში, საჯარო ხელისუფლების განხორციელებაში, კანონმდებლობაში და ა.შ.", - განაცხადა ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ ეკა ბესელიამ საკითხის წარდგენისას.
კანონპროექტის ზოგად პრინციპებზე საუბრისას, განათლების, მეცნიერებისა და კულტურის კომიტეტის თავმჯდომარემ ივანე კიღურაძემ განაცხადა, რომ მართალია „სახელმწიფო ენის შესახებ" კანონპროექტის ინიციატორი განათლების, მეცნიერებისა და კულტურის კომიტეტია, ამ საკანონმდებლო წინადადების ავტორი - ცნობილ ქართველ მეცნიერთა ჯგუფია, რომელთა შორის არიან ენათმეცნიერები და იურისტები. ამ ჯგუფის რამდენიმე წევრი: ჯონი ხეცურიანი, ავთანდილ არაბული და ლევან ღვინჯილია კანონპროექტის განხილვას ესწრებოდნენ და აქ შეკრებილ საზოგადოებას კანონპროექტის თაობაზე საკმაოდ ვრცელი ინფორმაცია მიაწოდეს.
„ეს არის ჩარჩო კანონი სახელმწიფო ენის შესახებ და პარლამენტი ძალიან კარგ საქმეს გააკეთებს, თუ ამ კანონპროექტს მიიღებს და შეავსებს იმ დიდ ხარვეზს, რომელიც არსებობს ამ სფეროში. სხვადასხვა საკანონმდებლო აქტებში ენის საკითხი მოწესრიგებულია მხოლოდ ფრაგმენტულად. საჭიროა ჩარჩო კანონი, სადაც ზოგადი პრინციპები იქნება განსაზღვრული. საჭიროა ინსტიტუციური გარანტიები სახელმწიფო ენის მართვისა და გამოყენების", - განაცხადა კონსტიტუციონალისტმა ჯონი ხეცურიანმა.როგორც სხდომაზე აღინიშნა, ამ კანონპროექტზე მუშაობა თითქმის ჩვიდმეტიოდე წლის წინათ დაიწყო. ერთ-ერთი მოწვევის პარლამენტში მისი განხილვა შედგა კიდეც, მაგრამ მოგვიანებით, „ვარდების რევოლუციის" შემდეგ კანონპროექტი პრეზიდენტის მიერ გაწვეულ იქნა.
პროექტის ავტორთა განცხადებით, მიუხედავად იმისა, რომ ადრინდელი კანონპროექტი თავის დროზე ექსპერტების მიერ მოწონებული იყო, ახლად წარმოდგენილი კანონპროექტი კიდევ უფრო შეჯერდა და დაიხვეწა, ექსპერტიზა გაიარა ევროპის ყველა შესაძლო ინსტანციაში.მეცნიერები მიიჩნევენ, რომ გასულმა წლებმა ყველას თვალნათლივ დაანახა, რომ სახელმწიფო ენის საკითხს საკანონმდებლო მოწესრიგება უდავოდ ესაჭიროება. ამ აზრს იზიარებს ეკა ბესელიაც. კომიტეტის თავმჯდომარის განცხადებით, ჯერ კიდევ საკანონმდებლო წინადადების განხილვისას, კომიტეტის წევრებს გარკვეული შენიშვნები ჰქონდათ და ბევრი მათგანი პროექტში უკვე გათვალისწინებულია. მისი თქმით, მნიშვნელოვანია ის ფაქტიც, რომ კანონპროექტს გავლილი აქვს საერთაშორისო ექსპერტიზა.
წარდგენილი პროექტით განისაზღვრება სახელმწიფო ენის სტატუსი, მისი დაცვის გარანტიები, სახელმწიფო და სხვა ენის გამოყენების თავისებურებები, განათლების ენის არჩევის შესაძლებლობა, სახელმწიფო ენის გამოყენების პრინციპები და სხვა საკითხები. პროექტით გათვალისწინებულია სახელმწიფო ენის დეპარტამენტის და სახელმწიფო ენის მუდმივმოქმედი კომისიის შექმნა, ასევე, პასუხისმგებლობის ზომები და ფულადი სანქციები "სახელმწიფო ენის შესახებ" კანონის მოთხოვნათა დარღვევისათვის.
