პარლამენტის თავმჯდომარემ, დავით უსუფაშვილმა ბიუროს დღევანდელ სხდომაზე პარლამენტის საქმიანობის შესახებ მოსახლეობის სწორი, სრულყოფილი და დროული ინფორმირების მნიშვნელობაზე ისაუბრა და კომიტეტების თავმჯდომარეებს ამ მიმართულებით მუშაობის გაძლიერება დაავალა. როგორც ,,ჯი-ეიჩ-ენს" პარლამენტიდან აცნობეს თავმჯდომარის განცხადებით, ინფორმირების ეფექტურობის ამაღლების თვალსაზრისით, თითოეულმა კომიტეტმა საკომიტეტო სხდომამდე ერთი დღით ადრე თითოეული მოქალაქისთვის გასაგებ ენაზე ზუსტად უნდა განსაზღვროს განსახილველი კანონპროექტების პრიორიტეტები, რაც პრესრელიზის სახით, საზოგადოებასთან ურთიერთობისა და ინფორმაციის დეპარტამენტის საშუალებით, განთავსდება პარლამენტის ოფიციალურ ინტერნეტ გვერდზე.
დღესვე, ბიუროს სხდომაზე, ზაფხულში განხორციელებული ვიზიტების შესახებ საპარლამენტო დელეგაციების წევრებმა დეპუტატებს ინფორმაცია მიაწოდეს. საგარეო ურთიერთობათა კომიტეტის თავმჯდომარემ, თედო ჯაფარიძემ და დიასპორისა და კავკასიის საკითხთა კომიტეტის თავმჯდომარემ, გუბაზ სანიკიძემ ირანის ისლამურ რესპუბლიკაში ვიზიტის მნიშვნელობაზე გაამახვილეს ყურადღება. მათი განმარტებით, ბოლო 9 წლის მანძილზე საქართველოს ირანთან აქტიური დიპლომატიური ურთიერთობა არ ჰქონია. როგორც დავით უსუფაშვილმა აღნიშნა, საერთაშორისო ურთიერთობების თვალსაზრისით, მნიშვნელოვანია საქართველოს დიპლომატიური ურთიერთობა სხვადასხვა მიმართულებით გამყარდეს და გაღრმავდეს. მანვე უახლოეს მომავალში დაგეგმილი ვიზიტების შესახებ მოახსენა ბიუროს წევრებს.
ბიუროს დღევანდელ სხდომაზე 2014 წლის 17-19 სექტემბრის პლენარული სხდომების დღის წესრიგი 23 საკითხით განისაზღვრა, თუმცა, როგორც სხდომაზე ითქვა, აღნიშნულ საკითხებს მიმდინარე კვირის განმავლობაში კომიტეტების სხდომებზე განხილული კანონპროექტებიც დაემატება.
დღესვე ბიუროს სხდომაზე ახალი საკანონმდებლო ინიციატივები დაარეგისტრირეს.
დავით უსუფაშვილმა ბიუროს წევრებს კიდევ ერთხელ შეახსენა, რომ პარლამენტის რეგლამენტის თანახმად, როგორც სასესიო, ასევე არასასესიო კვირის ყოველ ორშაბათს , 15 საათზე ჩატარდება.
