საგარეო საქმეთა მინისტრის მოადგილე დავით ზალკალიანი მიჩნევს, რომ თუ საქართველო გაეროს 69-ე გენერალურ ასამბლეაზე, ორი უმაღლესი დელეგაციით წარსდგება ეს სერიოზული დამაზიანებელი გარემოება იქნება ქვეყნის იმიჯისთვის. როგორც მინისტრის მოადგილემ ორშაბათის ტრადიციულ ბრიფინგზე განმარტა საქართველოს არ აქვს ფუფუნება, რომ გაერო-ს გენერალურ ასამბლეაზე ორი უმაღლესი დონის ლიდერით იყოს წარმოდგენილი.
,,მთავრობამ იმსჯელა ამ საკითხზე და გადაწყდა, რომ გაეროს გენერალურ ასამბლეაზე საქართველოს დელეგაციას პრემიერ-მინისტრი ირაკლი ღარიბაშვილი უხელმძღვანელებს. თუკი გაეროს გენერალურ ასამბლეაზე ორი დელეგაცია იქნება წარმოდგენილი, ეს რა თქმა უნდა ეს ძალიან სეროზული დამაზიანებელი ფაქტორი იქნება ჩვენი ქვეყნის იმიჯისთვის", _განაცხადა ზალკალიანმა.
შეგახსენებთ, რომ პრეზიდენტი გიორგი მარგველაშვილი გაეროს გენერალურ ასამბლეაზე საქართველოს მხრიდან ორი დელეგაციის გამგზავრებაში უხერხულობას ვერ ხედავს.
