NATO-ს ერთობლივი წვრთნები უნდა ჩატარდეს იორდანიისა და საქართველოს ტერიტორიაზე, - განაცხადა NATO-ს სამიტის აუდიტორიის წინაშე გაერთიანებული სამეფოს პრემიერ-მინისტრმა, დევიდ კამერონმა.
კამერონმა 3 პუნქტიანი გეგმა წარმოადგინა, რომელიც მისი განცხადებით იმ ახალი საფრთხეების გასამკლავებლად არის აუცილებელი, რომლის წინაშეც NATO დგას.
1. NATO-მ უნდა დაარწმუნოს აღმოსავლეთ ევროპის პარტნიორები, რომ ალიანსი ყოველთვის მზადაა აღასრულოს NATO-ს მე-5 მუხლით გათვალისწინებული პირობები.
კოლექტიური თავდაცვის განმტკიცების მიზნით, NATO უნდა შეთანხმდეს მრავალეროვანი წამყვანი ძალების ჩამოყალიბებაზე, რომელიც მსოფლიოს ნებისმიერ წერტილში განლაგებას 2-5 დღეში შეძლებს. NATO-ს რეფორმირებული საპასუხო ძალების სათაო ოფისი პოლონეთში განთავსდება. ხოლო სხვადასხვა შენაერთები განლაგდება აღმოსავლეთ ევროპის მოკავშირე ქვეყნებში.
აღნიშნულ საკითხზე შეთანხმების შემთხვევაში, გაერთიანებული სამეფო მზადაა ახალ მრავალეროვან ძალებში 3000-5000 კონტიგენტამდე წარადგინოს.
2. NATO-მ საკუთარი შესაძლებლობები უნდა გაზარდოს. გაერთიანებული სამეფო მზადაა GDP-ის 2 % თავდაცვაზე დახარჯოს, ხოლო ამ თანხის 20 % შეიარაღებას მოახმაროს. ეს იქნება ძლიერი მესიჯი მათთვის, ვინც მსოფლიოში მშვიდობის ხელყოფას ცდილობს. NATO-მ უნდა შეძლოს, რომ კრიზისს უპასუხოს სწრაფად და კოლექტიურად.
3. NATO-მ პარტნიორობისა და უსაფრთხოების ქსელი უნდა გააფართოოს. NATO უნდა გადაიქცეს ისეთ ორგანიზაციად, რომელიც არა მხოლოდ ფლობს შესაძლებლობებს, არამედ ეს შესაძლებლობები ექსპორტზე გააქვს.
აგრეთვე, NATO-ს ერთობლივი წვრთნები უნდა ჩატარდეს იორდანიისა და საქართველოს ტერიტორიაზე. აგრეთვე ერაყშიც, როდესაც იქ ახალი მმართველობა ჩამოყალიბდება.
