საქართველოს ყოფილი პრეზიდენტის მიხეილ სააკაშვილის განცხადებით, სიცრუეა გავრცელებული ინფორმაცია იმის შესახებ, რომ ის საბერძნეთში სამართალდამცავებმა შეაყოვნეს. სააკაშვილმა ამასთან დაკავშირებით კომენტარი ალბანეთში გააკეთა.
„საქართველოს მთავრობას გაუვრცელებია ინფორმაცია, რომ მათი მოთხოვნის საფუძველზე სადღაც თურმე დამაკავეს. რა შეიძლება ამაზე ითქვას, ეს უკვე სასაცილოც აღარ არის, ეს ჭორიკნობა და ამდენი სიცრუე.
საქართველოს დღევანდელი მმართველი ბიძინა ივანიშვილი და მისი მოურავი თავისი შესაძლებლობებიდან გამომდინარე ცდილობენ, მომწვდნენ იქამდე, სადამდეც მწვდებიან და იქ ჩამავლონ ხელი, მაგრამ არ გამოსდით. იმიტომ, რომ არა შეჯდა მწყერი ხესა, არა იყო გვარი მისი.
რა თქმა უნდა, მათ მოთხოვნებს არავინ სერიოზულად არ იღებს. მაგრამ, მათ ჯობია, ეს ენერგია, რასაც ხარჯავენ აქეთ-იქით წერილების გზავნაში , რეკვებში და რაღაცების შეთავაზებაში, დახარჯონ ქვეყნის შიგნით დანაშაულთან ბრძოლაზე, დახარჯონ თუნდაც ნატოს სამიტის წინ საქართველოს რეპუტაციის ამაღლებაზე",-აცხადებს სააკაშვილი.
როგორც სააკაშვილმა აღნიშნა, ძალიან სამწუხაროა, რომ "ყველაფერი კეთდება, რათა ქვეყნის მოქმედი პრეზიდენტი არ გაუშვან ქვეყნიდან".
"მე არ მიშვებენ უკან ჩემს ქვეყანაში. არადა, ფაქტი ჯიუტია, რომ ბოლო თვეების განმავლობაში მე შევხვდი უფრო მეტ მსოფლიო და საერთაშორისო ლიდერს, ვიდრე საქართველოს მოქმედი მთავრობა ერთად აღებული. ე.ი მე, რომელიც, აღარ ვარ აქტიური საერთაშორისო პოლიტიკაში, არ ვარ თანამდებობაზე, კიდევ ერთხელ ვიმეორებ, მეტი ხალხი მხვდება, ვიდრე ხვდება საქართველოს პრემიერს და პრეზიდენტს ერთად აღებულს. ეს არის ანომალიური სიტუაცია.
ვნებს ქვეყანას და ამიტომ, დროზე უნდა მორჩეს, უნდა გავიაროთ ეს ეტაპი და მივყოთ საქმის კეთებას ხელი, იმიტომ, რომ ვკარგავთ ძალიან ძვირფას დროს ჩვენი ქვეყნისთვის",-განაცხადა სააკაშვილმა.
ცნობისათვის, გუშინ გავრცელდა ინფორმაცია, რომ მიხეილ სააკაშვილი თურქეთ-საბეძნეთის საზღვარზე გააჩერეს. ბერძენ სამართალდამცველებს ყოფილი პრეზიდენტი სასაზღვრო კონტროლის დროს, საქართველოდან მიღებული მოთხოვნის საფუძველზე ჰყავდათ შეყოვნებული.
აღნიშნულ ინფორმაციას საბერძნეთში საქართველოს საელჩო ოფიციალურად ადასტურებს. საელჩოს მიერ გავრცელებული ცნობით, შეყოვნების მიზეზი საქართველოს მხრიდან მიღებული მოთხოვნა გახდა, რომელიც ყოფილი პრეზიდეტის დაკავებას უკავშირდებოდა. თუმცა, იმის გამო, რომ საერთაშორისო ძებნის პროცედურები დასრულებული არ არის, სამართალდამცველებმა სააკაშვილი 4-საათიანი შეყოვნების შემდეგ გაუშვეს.