საქართველოს საგარეო საქმეთა მინისტრი, მაია ფანჯიკიძე რუმინეთსი სამუშაო ვიზიტით იმყოფება, სადაც მონაწილეობას იღებს რუმინეთის დიპლომატიური წარმომადგენლობების შეხვედრაში. მაია ფანჯიკიძე ევროკავშირის უმაღლეს წარმომადგენელ ქეთრინ ეშტონთან და მოლდოველ კოლეგა ნატალია გერმანთან ერთად რუმინეთის ამბასადორიალზე საპატიო სტუმრის სტატუსით არის მიწვეული.
ამბასადორიალის გახსნის ოფიციალურ ცერემონიამდე გაიმართა ევროკავშირის უმაღლესი წარმომადგენლის ქეთრინ ესტონის, საქართველოს საგარეო საქმეთა მინისტრის მაია ფანჯიკიძის, მოლდოვის საგარეო უწყების ხელმძღვანელის ნატალია გერმანის და რუმინეთის საგარეო საქმეთა მინისტრის ტიტუს კორლეცეანის შეხვედრა.
ამბასადორიალის გახსნის ცერემონიაზე რუმინეთის საგარეო უწყების ხელმძღვანელმა მადლობა გადაუხადა ქართველ და მოლდოველ კოლეგებს ღონისძიებაში მონაწილეობისთვის. რუმინელ დიპლომატებს მიმართა ევროკავსირის უმაღლესმა წარმომადგენელმა ქეთრინ ესტონმა, მან რეგიონში არსებულ გამოწვევებზე, საერთაშორისო უსაფრთხოების საკითხებზე, უკრაინაში შექმნილ ვითარებაზე ისაუბრა. გამოსვლის დასასრულს მან დიპლომატების შეკითხვებს უპასუხა.
ამბასადორიალის მონაწილეებს დღესვე სიტყვით მიმართავს საქართველოს საგარეო საქმეთა მინისტრი მაია ფანჯიკიძე. რუმინეთში სამუშაო ვიზიტის ფარგლებში დაგეგმილია მისი პირისპირ შეხვედრა რუმინელ კოლეგასტან, ასევე რუმინეთის სენატის პრეზიდენტთან და დეპუტატთა პალატის თავმჯდომარესთან.
მასალის გამოყენების პირობები
